Vaşinqtonda Azərbaycan və Ermənistan arasında imzalanan Birgə Bəyannamə Cənubi Qafqazda təhlükəsizliyin, sabitliyin təmin olunması istiqamətində mühüm addım idi.

Adalet.az xəbər verir ki, bunu Qırğızıstan Prezidenti Sadır Japarov oktyabrın 7-də Qəbələdə keçirilən Türk Dövlətləri Təşkilatının (TDT) Dövlət Başçıları Şurasının 12-ci Zirvə görüşündə çıxışı zamanı bildirib.

Onun sözlərinə görə, TDT Təhlükəsizlik Şurasının toplantısı yaxın vaxtlarda Qırğızıstanda yüksək səviyyədə təşkil olundu:

"Türk dünyasının qarşılaşacağı hadisələrə dərhal reaksiya verəcəyi mexanizmlər üzərində çalışılır".

Qırğızıstan Prezidenti vurğulayıb ki, regional və qlobal təhlükəsizlik məsələsində Əfqanıstandakı vəziyyətə də xüsusi diqqət yetirilməlidir:

"Əfqanıstandakı məsələlərlə bağlı heç vaxt kənarda qalmamışıq, yaxın dövrdə də humanitar yardım göstərmişik. Eyni zamanda, Qəzzadakı vəziyyət də narahatlıq doğurur. Beynəlxalq hüququn tələblərinə uyğun şəkildə məsələnin həll olunacağına ümid edirik".