adalet.az header logo
  • Bakı 26°C
  • USD 1.7
23 May 2022 14:53
154
SİYASƏT

Könül Nurullayeva: “5 saat davam edən Brüssel müzakirələrində Ermənistan üçün yeni öhdəliklər müəyyənləşdi”

Avropa İttifaqı Şurası Prezidenti Şarl Mişel, Azərbaycan Respublikasının Prezidenti İlham Əliyev və Ermənistanın baş naziri Nikol Paşinyan arasında Brüsseldə baş tutan üçüncü üçtərəfli görüşün 5 saat davam etməsi müzakirələrdə bütün məsələlərin nəzərdən keçirildiyini göstərir. Şarl Mişelin görüşdən sonra mətbuata verdiyi açıqlamasından aydın olur ki, əslində budəfəki müzakirələrdə uğurlu nəticələr əldə olunub. İlk növbədə onu qeyd etməliyik ki, görüşdə və səslənən bəyanatda “Dağlıq Qarabağ” ifadəsi yenə işlədilmədi. Eyni zamanda status məsələsi, ümumiyyətlə, müzakirə olunmayıb, yalnız Azərbaycanda yaşayan erməni əhalinin hüquqları barədə danışılıb ki, rəsmi Bakı hər zaman onların təhlükəsizliyinə təminat verəcəyini bəyan edib. Yeri gəlmişkən, erməni ekspertlər də etnik ermənilərin təhlükəsizliyini Azərbaycanın tərkibində yaşayaraq təmin olunması kimi şərh edirlər.

Görüşdə diqqət çəkən məqamlardan biri də humanitar sahədə işğaldan azad olunmuş ərazilərin minalardan təmizlənməsi və itkin düşmüş şəxslərin taleyinin müzakirə olunmasıdır. Bu, Azərbaycan üçün prinsipial məsələdir və rəsmi Bakı bütün platformalarda Yerevana bu mövzuda öz öhdəliklərini xatırladır.

Brüsseldə yaxın zamanlarda Azərbaycan-Ermənistan sərhədində Sərhəd Komissiyalarının ilk birgə iclasının keçirilməsinə dair də razılıq əldə olundu. Belə ki, komissiya sərhədlərin delimitasiyası və sabit vəziyyətin ən yaxşı şəkildə necə təmin edilməsi ilə bağlı məsələlərlə məşğul olacaq. Əslində tərəflər aprel ayının 6-da baş tutan görüşdə aprelin sonunda sərhəd məsələləri ilə bağlı görüşün keçirilməsinə dair razılığa gəlmişdilər. Lakin Ermənistan etimad mühitini pozaraq, aprelin sonunda və mayın əvvəlində baş tutmalı olan mümkün görüşlərdən imtina etdi. Kommunikasiyaların açılması istiqamətində işin davam etdirilməsi, o cümlədən Zəngəzur dəhlizinin reallaşdırılması, beynəlxalq daşımaların tənzimlənməsi və digər məsələlər barədə də razılığa gəlinməsi sülhlə bağlı ümidləri artırır. Eyni zamanda sərhəd idarəçiliyi, təhlükəsizlik, torpaq haqları, həmçinin beynəlxalq daşımalar kontekstində gömrük prinsipləri barədə də razılıq var. Bütövlükdə Brüssel görüşü Ermənistan və Azərbaycan arasında dövlətlərarası münasibətləri tənzimləyən gələcək sülh müqaviləsi üzrə müzakirələrin irəli aparılması baxımından müsbət qiymətləndirilməlidir.

Aİ Şurası İttifaqı Şurasının Prezidenti Şarl Mişel iyul-avqust aylarına qədər yenə eyni formatda görüş olacağını da bildirdi. Bu o deməkdir ki, Ermənistan növbəti müzakirələrə qədər öhdəliklərini yerinə yetirməlidir. Burada təbii ki, Avropa İttifaqı da vasitəçi kimi öz məsuliyyətini anlayaraq, Ermənistanın etimad mühitini pozmasına mane olmalıdır.