Mədə xərçəngi dünyada geniş yayılmış, lakin çox vaxt gec mərhələdə aşkarlanan xəstəliklərdən biridir. 3000-dən çox xəstənin məlumatları əsasında aparılan yeni təhlil bu xəstəliyə yoluxan insanların həyat tərzində ortaq xüsusiyyətləri ortaya qoyub.

Adalet.az xəbər verir ki, araşdırmaya görə, erkən diaqnoz halları hələ də aşağıdır və xəstələrin əksəriyyəti xəstəliyi gec mərhələdə aşkar edir. Mütəxəssislər riskin artmasına səbəb olan 5 əsas amili müəyyən ediblər.

Ən diqqət çəkən faktorlardan biri yüksək duz istifadəsidir. Turşu, konservləşdirilmiş və çox ədviyyatlı qidalar mədənin selikli qişasını zədələyir və xərçəng riskini artırır. Bu mühit eyni zamanda zərərli bakteriyaların çoxalmasına şərait yaradır.

Digər əsas səbəb Helicobacter pylori infeksiyasıdır. Bu bakteriya uzun müddət müalicə olunmadıqda mədədə xroniki iltihaba səbəb olur və hüceyrə dəyişiklikləri ilə xərçəng riskini yüksəldir.

Qidalanma rejiminin pozulması da mühüm rol oynayır. Yeməkləri buraxmaq, nizamsız qidalanmaq və ya birdən çox yemək mədənin bərpa prosesini zəiflədir və riskin artmasına səbəb olur.

Bundan əlavə, siqaret çəkmə və spirtli içkilərin həddindən artıq qəbulu mədə xərçəngi riskini ciddi şəkildə artırır. Araşdırmalar göstərir ki, bu vərdişlərə sahib olan insanlarda risk əhəmiyyətli dərəcədə yüksəkdir.

Nəzarətsiz qalan xroniki mədə problemləri də təhlükə yaradır. Qastrit, xora və uzunmüddətli mədə ağrıları vaxtında müalicə olunmadıqda, zamanla daha ciddi fəsadlara, o cümlədən xərçəngə səbəb ola bilər.

Mütəxəssislər vurğulayır ki, bu riskləri azaltmaq üçün düzgün qidalanma, zərərli vərdişlərdən uzaq durmaq və mədə ilə bağlı şikayətlər zamanı vaxtında həkimə müraciət etmək vacibdir.//E-saglam.az