Bildiyiniz  kimi,  ötən gündən "Qaradağ rayonu ərazisində yerləşən “Sədərək” ticarət mərkəzi tərəfindən icarəyə verilmiş anbarda yanğın hadisəsi baş verib. Ölkə əhalisinin ən sıx alış-veriş etdiyi ticarət  mərkəzlərinin yanması ürəkaçan hal deyil!

Deputat Vüqar Bayramov deyib ki, bu, son 8 ildə sözügedən ticarət mərkəzində onuncu belə hadisə idi. Aydındır ki, bu dəfə də sahibkarlara xeyili ziyan dəyib".

 Məlumatlarda 13 nəfərin tüstüdən zəhərləndiyi  deyilir.

Ölkədə demək olar ki, yanğınların ard arası kəsilmir. Ticarət obyektlərinin yanması isə artıq vərdiş şəklini alıb. 2025-ci ildə  yanğın hadisə iki dəfə olub: Bir ötən gün, bir də 30 iyulda! Həmin gün yanğın “Sədərək” ticarət mərkəzinin ərazisində 3 kvadratmetr sahədə divar üzlüyünü əhatə edib.Yanğın qısa müddətdə söndürülüb və genişlənməsinin qarşısı alınıb.

 2024-cü il də Sədərək üçün xoş olmayıb.   15 İyun da Qaradağ rayonunda yerləşən ticarət mərkəzinin ərazisində ümumi sahəsi 50 m² olan tikinti materialları anbarının qarşısına yığılan plastik borular və digər obyektdə ümumi sahəsi 200 m² olan anbarın 2 ədəd plastikdən ibarət pəncərəsi və 5 m² sahədə dam örtüyü yanıb. Amma Sədərəkdə ən çox yanğın 2023-cü ilin payına düşür: Yanvar ayı - “Sədərək” ticarət mərkəzində 27 mağaza yanıb. 30 avqust- səhər saatlarında ticarət mərkəzinin 9 və 10-cu sıralarındakı mağazaların birində yanğın qeydə alınıb.

2022-ci ilin oktyabrında  "Sədərək" Ticarət Mərkəzinin alovları göylərə bülənd oldu. Əvvəlki  illərdə də Sədərəkdə  yanğınlar baş verib.

 Böyük obyektlərin qorunması düzgün təmin edilməyəndə və insanların səhlənkarlığına nəzarət edilməyəndə belə yanğınların baş verməsi intensiv baş verəcək. 

 Əntiqə Rəşid