“Rusiya və Türkiyə hazırda Türkiyə Silahlı Qüvvələrinin arsenalında olan "S-400" zenit-raket komplekslərinin üçüncü ölkəyə mümkün təkrar satışı məsələsini müzakirə edir”.

Adalet.az Lenta.ru-ya istinadla xəbər verir ki, bu barədə Rusiya Prezidentinin mətbuat katibi Dmitri Peskov bildirib.

O, mövzunun strateji əhəmiyyətini bu sözlərlə ifadə edib:

"Burada yalnız bir şeyi deyə bilərəm: bu mövzu son dərəcə həssas sahəyə aiddir. Bizim bu barədə Türkiyə tərəfi ilə təmaslarımız olub. Bu təmasları gələcəkdə də davam etdirəcəyik".

Qeyd edək ki, bundan əvvəl Türkiyənin nüfuzlu "Hürriyet" qəzeti rəsmi Ankaranın Rusiyadan aldığı "S-400" komplekslərini Fars körfəzi ölkələrindən birinə satmağı planlaşdırdığı barədə məlumat yaymışdı.
 

Nəşrin iddialarına görə, Ankara bu addımla ABŞ-ın tətbiq etdiyi CAATSA sanksiyalarından rəsmən çıxmaq və qlobal hərbi aviasiya gündəminin əsas mövzusu olan "F-35" beşinci nəsil qırıcı təyyarələrinin birgə istehsalı proqramına yenidən qayıtmaq üçün lazımi hüquqi düstur formalaşdırmağa çalışır.

Xatırladaq ki, Türkiyə 2017-ci ildə Rusiya ilə ümumi dəyəri təxminən 2,5 milyard dollar olan dörd "S-400" batareyasının tədarükünə dair rəsmi müqavilə imzalamışdı. Bu satınalmadan sonra ABŞ rəsmi Ankaranı "F-35" proqramından kənarlaşdırmışdı.

2019-cu ildə isə Vaşinqton "Rosoboronexport" komplekslərin Türkiyəyə təhvil verilməsi prosesinin tam başa çatdığını elan etmişdi. ABŞ Prezidenti Donald Trampın Ankarada türkiyəli həmkarı Rəcəb Tayyib Ərdoğanla görüşündən sonra isə “F-35”lərin Türkiyəyə verilməsi yenidən gündəmdədir.