“Azərbaycan dili” kafedrası ÜFTTD-ilə birlikdə UNEC-in 95 illik yubileyi ərəfəsində “Heydər Əliyevin dil siyasəti onun dövlət quruculuğu siyasətinin tərkib hissəsi kimi” mövzusunda elmi seminar keçirilib.

Adalet.az  xəbər verir ki, seminarı giriş sözü ilə “Azərbaycan dili” kafedrasının müdiri, professor Tofiq Əbdülhəsənov açdı. O, qeyd etdi ki, dünyanin böyük şəxsiyyətləri sırasında çox nadir insanın adını çəkmək olar ki, ümummilli liderimiz, dünya şöhrətli siyasətçi Heydər Əliyev qədər öz xalqının dili, tarixi, ədəbiyyatı, mədəniyyəti və incəsənəti ilə bağlı olsun. Heydər Əliyev Azərbaycan dilinin, ədəbiyyatının, qabaqcıl ictimai fikrinin mühafizəçisi kimi Azərbaycan ədəbiyyatı tarixində şərəfli bir səhifə açmışdı. O, Azərbaycan tarixinin yetişdirdiyi ən nadir simalardan biri, Türk dünyası və bəşəri sivil dünyanın qüdrətli şəxsiyyətlərindəndir.

Daha sonra elmi seminarda təqdimatlarla çıxış edən  kafedranın dosentləri Çinarə Qəhrəmanova və Mətanət Əmrahova vurğuladılar ki, Ulu öndər Heydər Əliyev  Azərbaycan xalqının misilsiz sərvəti olan  dilimizə, klassik irsimizə, ümumən bədii ədəbiyyatımıza və mədəniyyətimizə  xüsusi önəm verirdi. “Bu gün ümumiyyətlə, müstəqillikdən danışarkən ədəbiyyatımızın xalqımız üçün nə qədər zəngin sərvət olduğunu qeyd etmək lazımdır. Bizim ədəbiyyatımız, mədəniyyətimiz xalqımızın milli sərvətidir və intellektual mülkiyyətidir. Ulu öndər Heydər Əliyev ensiklopedik təfəkkürlü, müdrik şəxsiyyət idi. O, Azərbaycan xalqının qəhrəmanlıqlarla dolu tarixi keçmişinə, zəngin mənəvi dəyərlərinə, maddi-mənəvi irsinə, incəsənətinə qayğı ilə yanaşmışdır. Xalqın mənəviyyatını zənginləşdirən, onu bütün dünyada tanıdan milli mədəniyyətimizin hərtərəfli inkişafını, yüksəlişini daim izləmiş, ona ən ümdə vəzifəsi kimi baxmışdır. Bu gün də Heydər Əliyevin bizə miras qoyduğu irs layiqincə davam etdirilir. Ölkə başçısı tərəfindən Azərbaycan ədəbiyyatına, mədəniyyətinə, incəsənətinə yetərincə qayğı, diqqət göstərilir, gənc istedadların tapılıb üzə çıxarılması üçün xüsusi şərait yaradılır.