Ekspertlər Windows əməliyyat sistemində işi sadələşdirən və vaxta qənaət etməyə kömək edən gizli funksiyaları açıqlayıblar.

Windows sistemində bir sıra daxili alətlər mövcuddur ki, bir çox istifadəçi illərlə bu sistemdən istifadə etsə də, onlar haqqında məlumatlı deyil. Ekspertlərin sözlərinə görə, bu funksiyalar kompüterdə işi xeyli rahat və effektiv edə bilər.

Adalet.az xarici mediaya istinadən xəbər verir ki, mütəxəssislər bəzi imkanların  test mərhələsi, avadanlıq məhdudiyyətləri və ya təhlükəsizlik tələblərinə görə gizli saxlanıldığını bildirirlər. Lakin lazım gəldikdə istifadəçilər bu funksiyaların bir çoxunu özləri aktivləşdirə bilərlər. Belə funksiyalardan biri Windows Sandbox-dur — şübhəli faylları işə salmaq üçün izolyasiya olunmuş mühit. Onu aktivləşdirmək üçün Win + R düymələrini basıb optionalfeatures əmrini daxil etmək, açılan pəncərədə “Windows Sandbox” seçimini işarələmək və sonra kompüteri yenidən başladmaq lazımdır.

Şəxsi məlumatların qorunması üçün qovluqlara giriş nəzarətini aktivləşdirmək olar. Bunun üçün “Parametrlər” bölməsinə daxil olub “Windows Təhlükəsizliyi” hissəsinə keçmək, “Virus və təhlükələrdən qorunma” bölməsini seçmək, “Zərərli proqramlardan qorunma” ayarlarını açmaq və müvafiq funksiyanı aktiv etmək lazımdır. Ehtiyac olduqda etibarlı tətbiqləri də bu siyahıya əlavə etmək mümkündür.

Digər faydalı alət — nüvə izolyasiyasıdır. Bu funksiya sistem üçün əlavə təhlükəsizlik səviyyəsi yaradır. Onu aktivləşdirmək üçün “Parametrlər” → “Məxfilik və təhlükəsizlik” → “Windows Təhlükəsizliyi” → “Cihaz təhlükəsizliyi” → “Nüvə izolyasiyası” bölməsinə keçmək və “Yaddaş bütövlüyü” parametrini aktiv etmək lazımdır.

Çoxlu pəncərə ilə işləməyi asanlaşdırmaq üçün virtual iş masaları funksiyası mövcuddur. Onları yaratmaq üçün Win + Tab düymə kombinasiyasını basaraq “Yeni iş masası” seçimini etmək kifayətdir. Onlar arasında keçid isə Win + Ctrl və sol/sağ ox düymələri ilə həyata keçirilir.

İstifadəçilərə həmçinin pulsuz yayılan PowerToys alətlər paketini quraşdırmaq tövsiyə olunur. Bu paket əlavə funksiyalar təqdim edir, o cümlədən FancyZones — pəncərələri ekranda rahat şəkildə bölüşdürmək üçün vasitə. Onu istifadə etmək üçün PowerToys proqramını işə salmaq, FancyZones funksiyasını aktivləşdirmək və zonaları öz ehtiyaclarınıza uyğun qurmaq kifayətdir./Lent.az