Qaynar.info bununla bağlı tanınmış qələm adamları arasında"Detektivi ciddi ədəbiyyat sayırsınızmı?"mövzusundasorğu keçirib. Adalet.az həmin sorğunu təqdim edir: 

Səfər Alışarlı: "Yox. Detektiv əyləncə axtaranlar və evdar qadınlar üçündür".

Yusif Rzayev: "Edqar Ponun hekayələri detektivin ilk nümunələrindəndir. Bildiyiniz kimi o, çox ciddi yazıçıdır. Janrın dəxli yoxdur. Bütün janrlarda ciddi, ya qeyri-ciddi əsərlər ola bilər və var".

Qan Turalı: "Nəinki mən heç Nobel Komitəsi də detektivi ciddi ədəbiyyat saymır. Ümumiyyətlə, Çingiz Abdullayevdən başqa detektivi ədəbiyyat sayan adam görməmişəm".

Azər Qaramanlı: "Dedektiv əyləncə ədəbiyyatıdır. Vaxt keçirmək üçündür".

Elmin Həsənli: "Heç bir fikir bildirə bilmirəm. Oxumağa həvəsim yoxdur".

Rəbiqə Nazimqızı: "Baxır kim necə yazır. Konan Doylun Şerlok Holmsunu necə ciddi saymamaq olar?"

Zahir Əzəmət: "Yox. Kütləvi ədəbiyyatdır. Bunu nəzəriyyə kitabları da deyir, biz özümüzdən uydurmuruq. Müqayisədə daha maraqlı və daha peşəkar yazılmış detektivlər var".

Anar Gəraylı: "Yox. Çingiz Abdullayevin cəmi iki kitabini oxumuşam, sonra tovbə etmişəm. Axırıncı dəfə 6 il qabaq, tələbə vaxtı Aqata Kristini oxumuşam..."

Sevinc El Sevər: "Detektiv ayrıca bir janr kimi ciddi ədəbiyyat deyil. Ancaq bu mövzudan ciddi ədəbiyyatda istifadə olunur və oxucu toplamaqda əhəmiyyətli rol oynayır".

Seyfəddin Hüseynli: "Sırf detektiv, yəni janrın tipik nümunəsi olanlar elə də ciddi işlər deyil, amma detektiv xəttini əsas alan, ya da bir suyu detektivə çəkən dahiyanə əsərlər var, əlbəttə ki".

Rövşən Naziroğlu: "Qəti şəkildə yox".

Pərviz Cəbrayıl: "Yox. Mənimçün dedektiv "Cinayət və Cəza", "Parfümer", "Mənim adım qırmızı" kimi kitablardır".

Aygün Aslanlı: "Sayıram. Əgər Aqata Kristini, Konan Doylu və digər dünyaca tanınmış müəlliflərin detektivlərini dönə-dönə maraqla oxuyuramsa, demək, ciddi sayıram".

Azad Qaradərəli: "Dedektiv heç vaxt ciddi ədəbiyyat nümunəsi olmayıb və olmayacaq. Burada mahiyyət yox, qurama hadisəçilik var. İstənilən prokurorluq işçisinin 5 faiz ədəbi iustedadı olsa yaxşı dedektiv yaza bilər".

Cavid Zeynallı: "Mən divara yazılan sevgi etiraflarını da, tualet kağızına bekarçılıqdan cızma-qara edilən istedadlı cümləni də ədəbiyyat sayıram, nəinki detektivi".

Jalə İsmayıl: "Yox. O, basqa bir qabiliyyətdir. Boyük ədəbiyyatçı da onu bacarmaya bilər".

Mövlud Mövlud: "Detektiv də, seks də, din də, bir sözlə, bütün süjetlər, bütün təmayüllər əsl ədəbiyyata xidmət eləməlidir. "Cinayət və Cəza"da detektiv, "Lolita"da seks, "Karamazov qardaşları"nda din ədəbiyyata xidmət edən kimi. Ədəbiyyatı bunların hansınınsa ayağına vermək üçün ədəbiyyatdan uzaq olmalısan".

Səbuhi Məmmədli: "Aqata Kristi seviyyəsində hə..."

Aysel Əlizadə: "Aqata Kristinin detektivini cox ciddi hesab edirəm".

Mirmehdi Ağaoğlu: "Heç vaxt detektiv əsərlərə xüsusi marağım olmayıb. Barmaqla sayılacaq qədər detektiv əsər oxumuşam. Amm bu odemək deyil ki, detektiv janrı özü çox asandır. Bu janrın böyük ustaları var ki, digər janrda yazanlardan heç də pis deyillər. İkinci bir tərəfdən məncə artıq detektivin başqa janrlarla çulğaşması prosesi gedir. Postmodernizimn əsas prinsiplərindən biri nədir? Kütləviliyi əxz etmək, əsərlərə detektiv süjetlər salmaq. Ekonu yada salaq. "Gülün adı" ağır fəsləfi əsərdir, eyni zamanda onu bestseller edən detektiv süjetinin olmasıdır".

Taleh Şahsuvarlı: "Mən detektivi nə oxuyuram, nə də ədəbiyyat sayıram".

Sayman Aruz: "Mən o ədəbiyyatı 16-17 yaşlarımda oxumuşam. Fikrim formalaşdıqca o ədəbiyyatı ciddiyə almadım. Məncə cinayət və cəza kimi şeylər ciddi ədəbiyyatin daxilində yalnız həyatın bir guşəsində olan kiçik həqiqətlər kimi göstərilə bilər. Ciddi ədəbiyyat dedektiv ədəbiyyatın əksi olaraq hər şeyi əhatə edir. İnsan da, ədəbiyyat da ciddiləşdikcə, kamilləşdikcə, özü fakta və mənbəyə çevrilir. Yəni mütləqləşir. Detektiv ədəbiyyatın bu gücdə olmasına inanmıram doğrusu".