İşğaldan azad olunmuş yurd yerlərimizə nəzər saldıqca nə qədər seviniriksə, şad oluruqsa, bir o qədər kədər ürəyimizdən yan keçmir. Axı, bu torpaqların hər qarışına igid eloğullarımızın müqəddəs qanı çilənib...

Axı, bu torpaqların üzərində bu gün rahatca gəzə biliriksə bunu bizə bəxş edən minlərlə oğul artıq bir addım atmağı bacarmır, gün işığına həsrət qalanlarlar var, qolların yan açıb balasını qucaqlamağın həsrətini çəkir...Bəli, 100 minlərlə igid öz sağlamlığını bax o sevincək gəzdiyimiz yerlərə qurban verib.
Düz 32 il analar gözləri yollarda gecə -gündüz döyüşə göndərdiyi pəhləvan cüssəli oğlunu haraylayıb!Bu gün isə o analara, atalara, bacılara bir tabuta yığılmış bir ovuc sümük, cəsəd qırıqları veriblər. Lənətə gəlsin düşməni.... Deyirik...

Amma bir nüansı unuduruq. Unuduruq ki, biz nə vaxt düşmənimizin düşmən olduğunu unutsaq həyat bizi cəzalandırır, ən həssas yerimizdən vurur, göz dağı verir. İgidlərimizin sayının azalmağı, çıxdaş olmağı ilə bizə cəza kəsir həyat !
Ən xırda düşmən həmləsi, tuş olduğumuz ən az atəş i də unutmamalıyıq!

Unudacağıqsa, yenə torpaqlarımız işğal olunacaq, günahsız soydaşlarımız kütləvi şəkildə işgəncələrlə qətlə yetiriləcək, körpələrimiz tonqalda yanacaq, gəlinlərin-qızların namusuna toxunulacaq, qocaların başının dərisi üzüləcək, əli silah tutanlarımız erməni qəbirləri üzərində başı kəsiləcək, itlərə yem ediləcək, tankın arxasına bağlanıb dağları dərələri sürütlədib hər parçasını bir dərədə qoyacaqlar...

Bu günkü günü də unutmağa haqqımız yoxdu! Hazırda xoşbəxtik deyə, işğalda bir qarış torpağımız yoxdur deyə seviniriksə, ötənləri də unutmamalıyıq. 1993-cü il aprelin 2-si...
Ermənistan silahlı qüvvələri və onların havadarları Kəlbəcəri işğal etdi. 70 min nəfərdən çox əhalisi olan Kəlbəcərin işğalı nəticəsində 53 340 nəfər öz yurdundan didərgin düşdü, 55 hərbçi, 511 sakin öldürülüb, 321 nəfər əsir götürüldü və itkin düşdü, minlərlə sakin yaralandı.
Kəlbəcərin işğalına qədər rayonda 19 ibtidai, 44 orta, 33 natamam orta məktəb, 1 qiyabi orta təhsil məktəbi, 1 peşə məktəbi, 1 texnikum (Tibb Texnikumu), 16 uşaq bağçası, günü uzadılmış 38 qrup, 41 mədəniyyət evi, 44 klub, 1 şəhər mərkəzi xəstəxanası, 1 uşaq xəstəxanası, 9 kənd xəstəxanası, 23 kənd həkim ambulatoriyası, 75 feldşer-mama məntəqəsi və sair fəaliyyət göstərirdi. Düşmən o cənnəti taladı, yerlə yeksan etdi, xarabazara çevirdi.

Bir dəfə əməkdaşlarımızla redaksiyada söhbət edirdik. Söhbət Azərbaycan ən gözəl rayonu hansı olmasından düşdü. Onda yazıçı Aqil Abbas bir dünya dahisinin adını çəkdi , (unutmuşam adını) dedi ki, həmin dahi əsərlərində yazırmış ki, Allah bütün dünyanı insanlar üçün yaratdı, amma İtaliyanı özü üçün yaratdı. Bu o demək idi ki, dünyanın heç bir ölkəsi təbiətinə görə İtaliya ilə müqayisə oluna bilməz. Sonra Aqil müəllim söhbətinə davam edərək vurğuladı ki, bizim hər bir rayonumuz gözəldir, torpağı, suyu məcundur. Allah bütün rayonları azərbaycanlılar üçün yaradıb, amma Kəlbəcəri özü üçün yaradıb. Çünki heç bir rayonun Kəlbəcərlə müqayisə olunacaq təbii gözəlliyi yoxdur.

Həqiqətən elədir! Uşaqlığım o dağlarda keçdiyi üçün əminliklə deyə bilərəm ki, KƏLBƏCƏR BİR TƏBİƏT MÖCÜZƏSİDİR. Altı da, üstü də tükənməz sərvət olan Kəlbəcəri itirməklə Azərbaycan zəngin xəzinələr diyarını itirmişdi.
Nəhayət, 27 illik həsrətdən sonra o müqəddəs gün gəldi. 44 günlük müharibə başladı və Azərbaycan xalqı bu müqəddəs müharibədə qalib oldu. Azərbaycan Respublikası Silahlı Qüvvələrinin 9455 hərbi qulluqçusu “Kəlbəcərin azad olunmasına görə” medalı ilə təltif olundu. 2020-ci ilin 25 noyabrı tariximizə Kəlbəcər şəhəri günü kimi düşdü. İndi də düşmənin xarabazara çevirdiyi Kəlbəcər yenidən qurulur. Kəlbəcərdə tikinti işlərinə 80 milyon manat ayrılıb. Tikirlər, qururlar...

Kəlbəcərlilər doğma yurdlarına tezliklə qayıdacaq, orada xoşbəxt günlər yaşayacaq.
Amma bu sözü tək kəlbəcərlilərə demirəm, bütün yurduna köçən qarabağlılara, eyni zamanda Qarabağda elə qarabağlılar qədər fədakarlıq göstərmiş bütün Azərbaycan vətəndaşlarına deyirəm! Düşməni unutmayın, onların əməllərini hər gün xatırlayın! Əgər düşməni unutsanız təsəvvür edin ki, məşəqqət, məğlubiyyət, faciə, soyqırım, kütləvi işğəncə üsulları, gənclərimizin gənc yaşlarındanhəyatla vidalaşması yenidən yaşanacaq! Yenidən növbəti bir dəhşət dolu 32 il yaşayacağıq!

Düşməni unutmayın!

 Bütün şəhidlərimizin ruhu qarşısında elliklə baş əyirik! Əlinə silah götürüb vətəni yağıdan qorumuş bütün igidlərimizə Allahdan çansağlığı, el-oba sevgisi, ailə səadəti və nəhayət məmur  qayğıkeşlıyi arzulayırıq!

Əntiqə Rəşid