adalet.az header logo
  • Bakı 9°C
  • USD 1.7
25 Noyabr 2021 11:47
1591
MƏDƏNİYYƏT
A- A+

“Don Kixot “ baletində rusiyalı solistlər çıxış edəcəklər

Dekabrın 18-də Azərbaycan Dövlət Akademik Opera və Balet Teatrında L. Minkusun “Don Kixot”  baletinin tamaşası keçiriləcək. Tamaşada Rusiya Akademik Böyük Teatrının solistləri, balet artistlərinin beynəlxalq müsabiqələrinin laureatları Kristina Kretova ( Kitri )  və İqor Svirko ( Bazil ) iştirak edəcəklər.

Uzun illərdən bəri teatrın repertuarında olan bu balet tamaşaçıların ən çox sevdiyi klassik baletlərdəndir. Şən musiqi, mürəkkəb xoreoqrafiya, sevgi üzərində qurulmuş sujet xətti tamaşaya bayram əhval-ruhiyyəsi verir. Parlaq, coşqun, ehtiraslı və gözəl ispan rəqsləri, çoxsaylı balet tryukləri və dünyada çox məşhur olan balet elementi-fuete tamaşanı daha baxımlı edir.

Teatrın rəhbərliyi K. Kretova və İ. Svirkonu heç də təsadüfən bu tamaşaya dəvət etməyib. Hazırda bu cütlük dünyada çox tanınmış və tələb olunan balet ulduzlarıdır. Onlar dünyanın bir çox ölkələrində - Almaniya, Fransa, İsveçrə, İspaniya, Portuqaliya, İtaliya, Böyük  Britaniya, Yaponiya, Meksika, Çin və s. ölkələrində qastrol səfərlərində uğurla çıxış ediblər. Qastrolçularla yanaşı tamaşada Teatrımızın balet truppasının aparıcı solistləri - əmək artistlər Samir Səmədov, Cəmilə Kərimova, Elmira Süleymanova, solistlərdən Ayan Eyvazova, Teymur Oduşev və b. iştirak edəcəklər.

Tamaşanı dirijorların Antal Dorati adına beynəlxalq müsabiqənin laureatı Orxan Həşimov idarə edəcək.

 

İLTİFAT