24 May 2024 09:00
1722
LAYİHƏ

AZƏRBAYCAN – ÇİÇƏKLƏR İÇİNDƏ QAYA…

Azərbaycan elə bir məmləkət, elə bir ölkədir ki, onun daşı da, qayası da, torpağı da, gülü də, çiçəyi də qızıldır. Böyük Məmməd Araz Azərbaycanı  vəsf edərkən yazır:

Azərbaycan – çiçəklər içində qaya,
Azərbaycan – qayalar içində çiçək.
Mənim ruhum bu torpağı vəsf eləyərək,
Azərbaycan dünyasından  baxar dünyaya…

Bayaq dedik  axı, Azərbaycanın hər qarışı, hər yeri bir gülüstana  bənzəyir. Və bu gülüstanda da həmişə digər ölkələrin  gözü qalıb. Düşünüblər ki, nəyin bahasına olursa-olsun bizim məmləkətdən, bizim ölkədən bir şey qoparıb aparsınlar. Axı onlarda heç də bizim ölkədə olan yerüstü və yeraltı sərvətlər yoxdur. Elə məhz buna görə də həmişə Azərbaycana  böyük dövlətlər və o cümlədən inkişaf etməkdə olan  dövlətlər  yağlı tikə kimi  baxıblar. Amma Azərbaycan zaman-zaman öz müstəqilliyini, ərazi bütövlüyünü və eyni zamanda məmləkətini qorumağı bacarıb. 

Bizim ölkəyə kim gəlirsə, hara baş çəkirsə, hara gedirsə istər-istəməz onun  gözəlliyinə, qeyri-adi füsunkarlığına və təbiətinə heyran qalır. Çünki bu ölkənin həm də çox zəngin tarixi, mədəniyyəti və zəngin  keçmişi  vardır. Bir  avropalı deyir ki, dünyada ən çox sevdiyim millət azərbaycanlılardır. Çünki mən dəfələrlə  Azərbaycanda, onun paytaxtı Bakıda, Gəncədə, Şəkidə, Lənkəranda olmuşam. Hətta Naxçıvana qədər  gedə bilmişəm. Bakıdakı Qız qalasına, Şəkidəki Xan sarayına, Naxçıvandakı Əlincə qalasına, Gəncədəki qədim abidələrə heyran qalmışam. Və eyni zamanda həmin abidələrə tamaşa edəndə mütəxəssislər bizi tarixin bütün incəliyi ilə tanış ediblər. Və biz tanış  olandan sonra görmüşük ki, doğrudan da Azərbaycan  ən qədim tarixə  və mədəniyyətə malikdir. 

Biz avropalılar da öz elimizi-obamızı sevirik. Bu təbiidir, ancaq başqa ölkələri gəzməklə, öyrənməklə və seyr etməklə həm də yeni bir dünyanı kəşf edirik. Mənim Azərbaycanda yaxşı dostlarım var. Onlar  Azərbaycanın istehsal etdiyi  və dünya şöhrətli məhsullarını  mənə hədiyyə ediblər. Sizin bir «İstisu» var ey, dünyada onun analoqu yoxdur. Eşitmişik ki, həmin yerləri ermənilər  işğal eləmişdilər, amma sonradan sizin İkinci Qarabağ savaşında, daha doğrusu, 44 günlük müharibədə  həmin yerlər və o cümlədən işğal altında olan  bütün  ərazilər  azad olundu. O millət böyük və gözəl  xalqdır ki, onlar başqa xalqları da sevməyi bacarır, onların tarixinə, mədəniyyətinə, incəsənətinə, dininə və dilinə hörmətlə yanaşırlar. Bax, mən sizdə çox millətdə olmayan bu nadir dəyərləri, keyfiyyətləri görmüşəm. Ona görə də Azərbaycançılığa və Azərbaycana  məndə  böyük sevgi və hörmət var. Düşünürəm ki, bu tək məndə deyil, Azərbaycana gəlib buraları görənlər, insanları tanıyanlar hamısı  sizin xalqa  hörmətlə yanaşacaq. Ən azından ona görə ki, siz də bütün xalqlarla hörmətlə və məhəbbətlə yanaşırlar. 

Hər millət özünün gözəl, bəşəri və dünya tərəfindən sevilən cəhətlərini bir daha dünyaya  bəyan edir. Bizim millətin  ən gözəl keyfiyyətlərindən və əxlaqi dəyərlərindən biri də odur ki, bizim xalq  hətta düşməninə belə  mərhəmətlə yanaşır, ona ağır gündə  kömək edir, hətta  çörək və su verir. Heç uzağa getməyək, 2023-cü il  sentyabrın  19-da Qarabağda aparılan antiterror əməliyyatı zamanı Azərbaycan əsgərlərinin və ordusunun humanist  addımı  bütün dünyaya bir daha insanpərvərlik mesajı oldu. Çünki həmin anlarda Ermənistana  axın edən erməniləri, onların qocalarının, uşaqlarının Azərbaycan əsgəri təhlükəsizliyini  təmin edir, çətin vəziyyətdə olan  insanlara  çörək, su paylayırdı. Bu hadisələr elə erməni  sakinləri tərəfindən  lentə alınır və sosial şəbəkədə paylaşılırdı. Hətta bir erməni qadını deyirdi ki, biz türkləri baş kəsən, qan tökən bir millət kimi  tanıyırdıq, amma Xankəndini, Xocavəndi, Əsgəranı və digər  yerləri tərk edib Ermənistana  gedəndə gördük ki, türklər baş kəsən, qan tökən deyil, çörək verən, hətta düşməninə belə rəhm edən bir xalqdır. 

Nə yaxşı ki bu böyük bəşəri dəyərləri və insanlıq keyfiyyətləri hələ vicdanını itirməmiş bir çox ermənilər etiraf edirlər. Aydındır ki, bizim düşmən dünyada analoqu və oxşarı olmayan bir millətdir. Çünki onlar ömrü boyu azərbaycanlılardan sevgi, məhəbbət, diqqət görmüşdülər. Amma bunun  müqabilində ermənilər görün bizim başımıza hansı oyunu  açmadılar. İşğal etdikləri rayonlarda, qəsəbələrdə, kəndlərdə qadınları, uşaqları, qocaları qanına qəltan elədilər. Hətta vəhşilik o dərəcəyə çatdı ki, bizim əsgərləri əsir götürərkən ağaca bağlayıb üstünə benzin tökərək yandırdılar. Evlərimizi, eşiklərimizi külə döndərdilər, amma onların bu vəhşiliyindən sonra  Azərbaycan ordusu, Azərbaycan əsgəri onlara  mərhəmət göstərdi, yaralı, mülki əhalini xəstəxanaya apardı, müalicə elətdirdi və bundan sonra Ermənistana  yola saldılar. 

Bax,  buna görə də bütün dünya Azərbaycanı bəşəri dəyərlərə sadiq  olduğunu qəbul edir və xalqımızla razılaşırlar. Daha doğrusu, dünya görür ki, vəhşi kimdir, humanist kim. Çünki  ermənilər  işğal etdikləri ərazilərimizin daşını daş üstə qoymamışdılar. Amma Azərbaycan ordusu  işğaldan azad etdiyi  Xankəndini, Xocavəndi, Əsgəranı, Xocalını  və digər yaşayış məntəqələrini elə müdafiə etdilər ki, orda bir evə, bir mənzilə belə zərər toxunmadı. Bu nəyin göstəricisidir? Bu onun göstəricisidir ki, Azərbaycançılıq ideyası  min illər bundan qabaq da olub və min il bundan sonra da olacaq. Bizim xalqın əsas missiyası humanistlik, bəşəri dəyərlərə  hörmət, dinlərə  fərq qoymamaq, irqi ayrı-seçkilik salmamaqdır. Bax, buna görə də dünyada Azərbaycan xalqı və ölkəmiz həmişə seviləcək!
 

Faiq QİSMƏTOĞLU 

Yazı Medianın İnkişafı Agentliyinin maliyyə dəstəyi ilə hazırlanıb.