Azərbaycan Respublikasının Səhiyyə Nazirliyi, Azərbaycan Respublikasının Qida Təhlükəsizliyi Agentliyi (AQTA) və Tibbi Ərazi Bölmələrini İdarəetmə Birliyi (TƏBİB) Samux rayonunda qeydə alınan qarayara hadisəsi ilə bağlı birgə məlumat yayıb.

Adalet.az xəbər verir ki, birgə məlumatda bildirilib ki, ilkin epidemioloji araşdırmalar zamanı xəstəliyə şübhəli bilinən şəxslərin iribuynuzlu heyvanlarla təmasda olduğu müəyyən edilib.

Xəstəliyə şübhəli bilinən ilk şəxsdən götürülmüş müayinə materialının laborator müayinəsi nəticəsində “qarayara” diaqnozu təsdiqlənib.

Hazırda xəstə şəxslərlə təmasda olanlar müəyyənləşdirilib və tibbi müşahidəyə cəlb olunublar. Dəri yaraları olan şəxslərdən laborator müayinələrin aparılması məqsədilə nümunələr götürülüb.

Xəstə heyvanla təmasda olmuş 9 nəfər müəyyən edilərək Abbas Səhhət adına Gəncə Şəhər Birləşmiş Xəstəxanasının Yoluxucu Xəstəliklər şöbəsində izolyasiya olunub. Onların əsasən Samux rayon sakinləri olduğu bildirilir. Həmin şəxslərdən laborator müayinə üçün nümunələr götürülərək Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib.

Məlumata görə, qarayaranın törədicisi torpaq mənşəlidir və xəstəliyə dünyanın müxtəlif yerlərində rast gəlinir. Qarayara əsasən xəstə və ya tələf olmuş heyvanlarla, həmçinin onların yoluxmuş toxumaları və məhsulları ilə təmas nəticəsində insana keçən zoonoz xəstəlikdir.

Xəstəliyin insandan-insana ötürülməsi olduqca nadir hallarda baş verir. Xəstə heyvanın termiki emal olunmuş ətinin və ondan hazırlanmış qidaların istehlakı isə qarayaraya yoluxmaya səbəb olmur.

Hazırda hadisə ilə bağlı vəziyyət aidiyyəti qurumların nəzarətindədir və zəruri epidemioloji tədbirlər həyata keçirilir. Bildirilib ki, əhali arasında xəstəliyin yayılması müşahidə olunmur və vətəndaşların narahatlığına əsas yoxdur.

Vətəndaşlara xəstə və ya tələf olmuş heyvanlarla, eləcə də şübhəli heyvan mənşəli məhsullarla təmasdan çəkinmək, xəstəliyə şübhə yaradan əlamətlər müşahidə etdikdə isə vaxtında tibb müəssisəsinə müraciət etmək tövsiyə olunur.