8 aprel 2026-cı il tarixində Azərbaycan Respublikasının xarici işlər naziri Ceyhun Bayramov ölkəmizdə səfərdə olan Qazaxıstan Respublikasının xarici işlər naziri Yermek Koşerbayev ilə görüşüb.

XİN-dən Adalet.az-a verilən xəbərə görə, nazirlər arasında baş tutan təkbətək görüş, daha sonra hər iki tərəfin nümayəndə heyətlərinin iştirakı ilə geniş tərkibdə davam edib.

Görüş zamanı, Azərbaycan ilə Qazaxıstan arasında strateji münasibətlərin səviyyəsindən məmnunluq ifadə olunub və bu münasibətlərdən irəli gələn məsələlər, eləcə də regional vəziyyət ətrafında geniş müzakirə aparılıb.

Ali və yüksək səviyyəli qarşılıqlı səfərlərin dinamikasının ikitərəfli münasibətlərin inkişafına mühüm töhfə verdiyi vurğulanıb.

Bildirilib ki, iki ölkə arasında əməkdaşlıq son illərdə daha da intensivləşərək iqtisadiyyat, ticarət, enerji, sənaye, nəqliyyat-logistika, rəqəmsallaşma və texnologiya, kənd təsərrüfatı, turizm, mədəni, humanitar və təhsil sahələrini əhatə edən çoxşaxəli əməkdaşlıq formatına çevrilib.

Qarşılıqlı sərmayələr, o cümlədən 300 milyon ABŞ dolları həcmində investisiya fondunun yaradılması iqtisadi əməkdaşlığın inkişafında mühüm istiqamət kimi qeyd olunub.

Qarşılıqlı ticarət dövriyyəsinin artırılması, qeyri-neft sektorunda birgə layihələrin həyata keçirilməsi və regional bağlantıların gücləndirilməsi istiqamətində mövcud potensialın əməkdaşlığın gələcək inkişafına geniş imkanlar yaratdığı xüsusilə vurğulanıb.

Orta Dəhliz üzrə əməkdaşlığın strateji əhəmiyyəti vurğulanaraq bu marşrutun Avropa ilə Asiya arasında yükdaşımaların artmasına töhfə verdiyi və tranzit potensialının gücləndirilməsinin mühüm istiqamət olduğu diqqətə çatdırılıb.

Mərkəzi Asiya regionu ilə intensiv dialoqun inkişafı, o cümlədən C6 formatı çərçivəsində əməkdaşlıq ətrafında fikir mübadiləsi aparılıb.

Bununla yanaşı, beynəlxalq və regional platformalarda, xüsusilə Türk Dövlətləri Təşkilatı və Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) çərçivəsində əməkdaşlığın daha da genişləndirilməsi perspektivləri müzakirə olunub və bu platformalarda qarşılıqlı dəstək mexanizmlərinin gücləndirilməsi diqqət mərkəzində olub.

Tərəflər Yaxın Şərqdəki gərginlikdən ciddi narahatlıqlarını ifadə edərək, münaqişələrin yalnız diplomatik vasitələrlə həllinin əhəmiyyətini vurğulayıblar. İran və ABŞ arasında əldə olunmuş atəşkəs alqışlanıb.

Nazir Ceyhun Bayramov həmkarına Azərbaycan ilə Ermənistan arasında münasibətlərin normallaşdırılması prosesi, eləcə də azad edilmiş ərazilərimizdə aparılan bərpa-quruculuq fəaliyyətləri və keçmiş məcburi köçkünlərin qayıdışı barədə məlumat verib.

İşğaldan azad edilmiş Füzuli şəhərində Qazaxıstan tərəfinin dəstəyi ilə inşa olunmuş Kurmanqazı adına Uşaq Yaradıcılıq Mərkəzinə görə təşəkkür ifadə olunub.

Görüşdə həmçinin, qarşılıqlı maraq doğuran digər məsələlər ətrafında da fikir mübadiləsi aparılıb.

***

13:10

Azərbaycan xarici işlər naziri Ceyhun Bayramov və Qazaxıstan Respublikasının xarici işlər naziri Yermek Koşerbayev arasında geniştərkibli görüş keçirilir.

Adalet.az xəbər verir ki, bu barədə XİN-in “X” hesabında paylaşım edilib.

Azərbaycan və Qazaxıstan iqtisadiyyat, ticarət, enerji, sənaye, kənd təsərrüfatı, nəqliyyat, logistika, texnologiya və rəqəmsal sahələrdə artan əməkdaşlığı qeyd edərək güclü strateji əlaqələri bir daha təsdiqləyiblər.

Nazirlər həmçinin Orta Dəhlizin Avropa-Asiya ticarətinin artırılmasında rolunu və tranzit infrastrukturuna və regional bağlantıya töhfə verən birgə layihələrin əhəmiyyətini vurğulayıblar.

Hər iki tərəf Yaxın Şərqdə gərginlikdən narahatlıq ifadə edib, tərəflər arasında əldə olunmuş atəşkəsin regiona sabitlik və sülh gətirəcəyinə ümid etdiklərini bildiriblər.

Nazirlər həmçinin digər regional və qlobal təhlükəsizlik çağırışlarını müzakirə ediblər.

Nazir Ceyhun Bayramov həmçinin həmkarını Azərbaycan ilə Ermənistan arasında davam edən normallaşma və sülh prosesi barədə məlumatlandırıb.

***

13:02

Azərbaycan və Qazaxıstan xarici işlər nazirləri arasında geniştərkibli görüş keçirilib.

***

12:19

Xarici işlər naziri Ceyhun Bayramov Qazaxıstanın xarici işlər naziri Yermek Koşerbayev arasında təkbətək görüş keçirilir.

Adalet.az xəbər verir ki, nazirlik bu barədə "X" sosial media hesabında məlumat yayıb.

***

12:09

Xarici işlər naziri Ceyhun Bayramov Qazaxıstanın xarici işlər naziri Yermek Koşerbayevi qəbul edib.

Adalet.az xəbər verir ki, bu barədə nazirlik "X" sosial media hesabında məlumat yayıb.