Azərbaycan öz müstəqilliyini əldə etdikdən sonra hərbi sahədə və ordu  quruculuğunda çox böyük islahatlar apardı, yeniliklər  həyata  keçirdi. Çünki heç kimə  sirr deyil ki,  1990-cı illərin  əvvəllərində Azərbaycanda siyasi böhran  yaşanmaqla yanaşı, ordu  quruculuğunda da heç bir irəliləyiş və inkişaf yox idi.  Üstəlik də hakimiyyətdə olan Xalq Cəbhəsi  bu sahədə elə bir  nailiyyətlər və uğurlar  əldə  edə bilməmişdi. Bununla  yanaşı, siyasi hakimiyyətə  gəlmək üçün  çəkişmələr,  münaqişələr davam edirdi.  Elə  həmin münaqişələr  nəticəsində  biz Kəlbəcəri, Şuşanı, Ağdamı, Füzulini, Zəngilanı, Qubadlını, Cəbrayılı  itirdik. Başqa  sözlə demiş olsaq, torpaqlarımızın  20 faizi   ermənilər  tərəfindən  işğal olundu.  Çünki  onların dünyada havadarları, qahmar çıxanları,  arxasında duranları çox idi. 

Bax belə bir  mürəkkəb  situasiyada Azərbaycan az qalırdı öz dövlətçiliyini  itirsin.  Ona görə də  xalqın  və millətin  tələbə ilə Ulu Öndər  Heydər Əliyev Azərbaycana   gətirildi və bu xalq, bu millət onu  özünə  yenidən rəhbər seçdi. Əlbəttə, rəhbər olmaq asan idi, amma  ən çətini  o idi ki, səni  seçən xalqın etimadını, inamını  doğruldasan.  Heydər Əliyev  hakimiyyətə  gəldi  və qısa zaman  kəsiyində  Azərbaycanı  çətin  vəziyyətdən  xilas etməyin  yollarını  axtarıb  tapdı. On il ərzində ölkəmiz iqtisadi, hərbi və siyasi cəhətdən sürətlə  inkişaf etdi.  İlk növbədə  ordu quruculuğuna böyük önəm verildi. Və artıq ordu öz gücünü  1994-cü ilin yanvarın  əvvəllərində Füzulinin 22 yaşayış məntəqəsini və Horadiz  şəhərini   azad etməklə  dünyaya  göstərdi. 

Azərbaycanda ordu sahəsində ən  böyük  uğurlar prezident  İlham  Əliyevin  hakimiyyəti dövründə  qazanıldı.  Bir daha  Azərbaycan  Ordusu ən müasir  silahlarla,  ağır texnika ilə , döyüş  maşınları  ilə təchiz edildi. Ölkəmiz qardaş  Türkiyənin  qabaqcıl döyüş  taktikasını  və manevr üsullarını  öyrəndi. Eyni  zamanda  zabitlərimiz  və xüsusi  təyinatlılarımız Türkiyədə  xüsusi  kurs  keçərək  daha da  peşəkarlaşdı və hərbi  sirrlərə  yiyələndi. Bütün bunlar  Ali Baş  Komandan,  prezident İlham Əliyevin apardığı məqsədyönlü və uğurlu siyasət nəticəsində əldə edildi. Ermənilər tez-tez atəşkəsi pozur, sərhəd bölgəsini və eləcə də Qarabağdan yaşayış məntəqələrimizi müxtəlif  tipli  artileriya qurğularından  atəşə  tuturdular. Artıq 2020-ci il  sentyabr  27-də Azərbaycanın  səbr kasası tükəndi. Ermənilərin  təxribatlarının, hücumlarının və yaşayış  məntəqələrimizin  atəşə tutulmasının  qarşısının  alınması  üçün Ali Baş Komandanın  əmri ilə  Azəobaycan Ordusu  əks hücuma keçdi. Qanlı döyüşlər  başladı və ermənilər  düşünmədikləri və ağıllarına gəlmədikləri zərbələr aldılar. Belə ki, Azərbaycan  ordusu sentyabrın  27-dən  30-na qədər İkinci Qarabağ savaşında Füzulinin və Cəbrayılın  8 kəndini  işğaldan  azad elədi.  Təbii ki, bu  döyüşlər   elə belə  döyüş  deyildi.  Çünki  burda ölüm-dirim   mübarizəsi  gedirdi. Hətta  ermənilərin  havadarları   Fransa da, Avropa da ona   çalışırdılar ki,  döyüşü  saxlasınlar və  danışıqlara  başlasınlar.  Amma Azərbaycan   prezidenti  İlham Əliyev  heç bir  təzyiqlərə  və  təsirlərə  məhəl qoymayaraq döyüşün daha  sürətlə  davam etdirilməsini  əmr edirdi. Heç şübhəsiz  Azərbaycan ordusu  qarşıya qoyulmuş məqsədə çatmaq üçün bütün qüvvələrini və döyüş  texnikalarını müharibəyə cəlb eləmişdi. Heç kimin ağlına  gəlməzdi ki, Azərbaycan  qısa zaman kəsiyində, daha doğrusu 44 gündə  işğal olunmuş  torpaqlarının hamısını  azad edəcək. Amma bu xalq, bu millət cənab prezident  İlham Əliyevin və Azərbaycan Ordusunun  yanındaydı.  Cənab Prezident  də  çıxışlarında deyirdi ki, müharibədə  qəhrəmanlığı  Azərbaycan xalqı göstərir.

Çünki biz hamımız bir yumruq kimi  birləşməyi bacardıq və o yumruğu düşmənin başına endirdik. 

Bax, belə  ildırım sürətli  döyüşlər nəticəsində  Azərbaycanın  işğal olunmuş  yaşayış  məntəqələri, qəsəbələri, şəhərləri azad  olundu. Cəbrayıl azad olundu!... Hadrut azad olundu!.. Füzuli  azad olundu!.. Qubadlı  azad olundu!.. Zəngilan azad  olundu!.. Şuşa azad olundu!.. Sonradan  isə danışıqlar  nəticəsində Ağdam, Laçın və Kəlbəcər  erməni  işğalçıları  tərəfindən təmizləndi. Onlar  tək  torpaqlarımızı, Vətənimizi işğal etməmişdilər,  həm də milli-mənəvi dəyərlərimizi əlimizdən almışdılar. 44 günlük tarixi  mücadilədə Azərbaycan  Ordusu  həm  torpaqlarımızı  azad elədi,  həm də  işğal olunmuş milli-mənəvi dəyərlərimizi  yağı düşmənin  əlindən almağı  bacardı.

Ermənilərin dönə-dönə  dünyaya  bəyan etdikləri «Ohanyan  səddi» cəmi bir  günün  içində  Azərbaycan  Ordusu, Azərbaycan əsgəri  tərəfindən  darmadağın edildi. Onlar bu səddi  tək Cəbrayıl və Füzuli  istiqamətində  yox,  bütün işğal olunmuş  ərazilərimizdə  qurmuşdular. Və düşünürdülər ki, 30 il belə  olub və bundan  sonra da  bu müdafiə səddi  yarılmayacaq. Amma  qüdrətli  və  güclü  Azərbaycan  Ordusu  onların bu  sədlərini   bayaq dediyimiz kimi, bir neçə  saatın  içində  darmadağın elədi.

Tarix göstərdi ki, İlham Əliyev kimi  Ali Baş Komandanı  və prezidenti olan güclü  orduya  sahib olan ölkənin torpaqlarını işğal altında  saxlamaq mümkün deyil. 44 günlük mücadilənin və möhtəşəm  qələbənin  davamı Ali Baş Komandan  İlham Əliyevin  rəhbərliyi ilə  2023-cü il sentyabrın 19-da və 20-də lokal  antiterror  əməliyyatı ilə başa  çatdı. Bu əməliyyat cəmi 23 saat  43 dəqiqə çəkdi. Bir daha  dünya  gördü ki, Azərbaycan prezidenti  İlham Əliyev  və Azərbaycan  Ordusu  necə qüdrətli bir  qüvvədir.  Çünki  dünya  hərb tarixində  heç vaxt belə  unikal əməliyyat  olmamışdı. Ermənilər ağ bayraq   qaldırdılar, təslim oldular və silah-sursatları  təhvil verdilər. 23 saat 43 dəqiqəlik  möhtəşəm döyüş  Azərbaycanın ərazi bütövlüyünü  bütövlükdə təmin etdi  və dünya tarixində Azərbaycan  işğal olunmuş torpaqlarını   tamamilə  azad etməklə yenidən  bir səhifə yazdı. Qoy dünya  görsün ki,  Azərbaycan  hansı  hərbi gücə  və qüdrətə  malikdir.  Bax, buna görə də bütün  dünya  bu gün  bizimlə razılaşmağa  məcburdur.  Kimsə ərazi  bütövlüyümüzə  göz diksə və hansısa hərbi  əməliyyatı  aparsa bax, belə bir  dərs  alacaq. Yəni  başında Dəmir  Yumruğu görəcək!

Faiq QİSMƏTOĞLU

Yazı Medianın İnkişafı Agentliyinin maliyyə dəstəyi ilə hazırlanıb.