Rusiyalı bloger və aparıcı Nastya İvleyeva Efiopiyaya səfəri zamanı yaşadığı təcrübə ilə diqqət çəkib.

Adalet.az xəbər verir ki, bloger hamer qəbiləsini ziyarət edib və onlara hədiyyə olaraq 350 dollara inək alıb. Lakin heyvanın dərhal kəsilərək yemək üçün hazırlanması İvleyevanı kövrəldib.

"Ağlayacağam. Ona çox yazığım gəlir" deyə, bloger hisslərini gizlədə bilməyib.

Bununla belə, onu daha böyük sınaq gözləyib. Hamer qəbiləsinin üzvləri ənənəyə uyğun olaraq Nastya İvleyevadan inəyin qanını içməsini istəyiblər. Bloger əvvəlcə bu təklifə təəccüblə yanaşsa da, qəbilənin adətinə hörmət əlaməti olaraq rituala qatılıb.

İvleyeva sonradan qanın dadının ilıq və duzlu olduğunu bildirib:

"Birincisi, qan da mayedir. İkincisi isə zülal əldə etməyin sürətli və keyfiyyətli yoludur. Bu, onların əsrlərdir davam edən ənənəsidir".

Daha sonra qəbilə başçısı blogerə bildirib ki, onlar əti nadir hallarda – təxminən iki aydan bir yeyirlər. Qalan vaxtlarda isə əsas qidaları və içkiləri xüsusi hazırlanmış pivə olur.