Türkiyə Ukrayna ilə Rusiya arasında davamlı sülhə nail olmaq istiqamətində səylərə konstruktiv yanaşma sərgiləyir və İstanbuldakı danışıqlar zamanı əvvəllər nümayiş etdirdiyi mühüm rolu oynamağa hazırdır.

Adalet.az xəbər verir ki, bu barədə Türkiyə Prezidenti Rəcəb Tayyib Ərdoğan Cənubi Afrikada keçirilən G20 sammitində onu müşayiət edən jurnalistlərlə söhbətində bildirib.

Türkiyə lideri xatırladıb ki, Ankara uzun müddətdir Ukraynada sülhün təməlini qoymaq üçün fəal səylər göstərir. “Mən bu məsələni ABŞ Prezidenti Donald Trampla görüşlərim zamanı dəfələrlə müzakirə etmişəm. Biz inanırıq ki, ədalətli sülh müqaviləsində uduzan olmayacaq, sülhə gedən yol isə dialoq və birgə müzakirələrdən keçir”, - deyə Prezident Ərdoğan vurğulayıb.

Siyasətçi qeyd edib ki, bu gün Ukrayna üçün son sülh planı (ABŞ-a məxsus – AZƏRTAC-ın qeydi) ətrafında aktiv müzakirələr davam edir. O deyib: “Bu plan sülhün təməlini yarada biləcəkmi? Bu sənəd üzrə razılığa gəlmək mümkündürmü? Bəli, razılığa gəlmək olar. Bəs dəqiq olaraq necə? Bu məsələ araşdırılmalıdır”. Türkiyə lideri bildirib ki, əgər plan tərəflərin, o cümlədən təhlükəsizlik sahəsindəki gözləntilərini yeni qeyri-sabitlik mərhələlərinə səbəb olmayacaq şəkildə qarşılayırsa, razılaşma əldə etmək mümkündür.

Dövlət başçısı izah edib ki, razılaşma müsbət gündəmdə, artıq razılığın olduğu məqamlara əsaslanaraq başlana bilən danışıqlar prosesinin təməlində mümkündür. “Əgər bütün tərəflərin gözləntilərini qarşılayacaq bir təməl yarada bilsək, davamlı sülhə gedən yol açılacaq. Ədalətli və davamlı sülhə yol açacaq təşəbbüsləri müzakirə etməyə başlamaq vacibdir”, - deyə Prezident Ərdoğan əlavə edib.