Bu gün Hörmüz boğazından keçən gəmilərdən xidmət haqqı alınmasına dair planın icrasına başlanıldığı açıqlanıb.

Adalet.az xəbər verir ki, bu barədə SEPAH-a bağlı “Fars News” agentliyi məlumat yayıb.

Məlumata görə, plan İqtisadiyyat Nazirliyi ilə əməkdaşlıq çərçivəsində və Ali Milli Təhlükəsizlik Şurasının nəzarəti altında həyata keçirilir. Bu məqsədlə xüsusi işçi qrupunun yaradıldığı qeyd olunub.

“Fars”ın məlumatına əsasən, əldə olunan vəsaitlər dövlət xəzinəsinə yönləndiriləcək və müəyyən edilmiş sahələrdə istifadə olunacaq.

Agentlik bildirib ki, ödənişlər yalnız nağd formada həyata keçirilmir. Bəzi hallarda ödənişlər Tether (USDT-ABŞ dollarına indekslənmiş rəqəmsal valyuta), mal və ya barter yolu ilə aparılır.

Belə hallarda təqdim edilən mal və ya xidmətlərin dəyəri hesablanaraq ümumi ödəniş məbləğindən çıxılır.