Son zamanlar gündəmi zəbt edən məsələlərdən biri də Kinematoqrafçılar İttifaqından kütləvi istefaların olmasıdır.

Biz də Adalet.az olaraq məsələ ilə bağlı aktyorların fikirlərini öyrəndik.
 

Gənc Tamaşaçılar Teatrının aktrisası, Əməkdar artist Zemfira Əbdülsəmədova hadisələrə münasibət bidirib : “ Kinematoqrafçılar İttifaqının mənə heç bir xeyri yoxdur. Efirləri izləmirəm. İttifaqda nə baş verdiyindən xəbərsizəm. İndi siz dediniz, məlumatım oldu. Azərbaycan kimi kiçik ölkədə iki kino ittifaqının olmağı nəyə lazımdır? Kinonun olmadığı bir yerdə iki kino ittifaqının olması absurddur. Şəfiqə Məmmədovanın sədrlik etdiyi ittifaqın üzvüyəm. Düşünürəm ki, Rasim Balayevin sədrlik etdiyi ittifaqa üzv olum”.

YUĞ Dövlət Teatrının aktyoru, Xalq Artisti Məmməd Səfa Qasımov isə Kinematoqrafçılar İttifaqında baş verən hadisələrdən xəbərsiz olduğunu söylədi.

Bir çox sevilən rolların ifaçısı istedadlı aktyor Rəşat Kəsəmənli də hadisələrdən xəbərsiz olan aktyorlar siyahısındadır: “Mən xəbəri sizdən eşidirəm. Məsələ ilə bağlı məlumatsızam”.

Dövlət Pantomima Teatrının aktyoru, Əməkdar artist Elman Rəfiyev də baş verənlərlə bağlı fikir bildirib: “ Mən heç bir ittifaqın üzvü olmadığım üçün bu barədə heç nə deyə bilməyəcəm. Ancaq arzulayıram ki, bu iki ittifaq birləşsin və bu parçalanma bitsin. Düşünürəm ki, kino üçün bir ittifaq yetər. Aktyorlar da o vahid ittifaqın üzvü olmalıdır. Bu, mənim şəxsi fikrimdir.”

Əntiqə Kərimzadə