İyunun 19-da Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevlə partiyanın sədri Əli İnsanov arasında görüş keçirilib.

Bu barədə Adalet.az-a Haqq Ədalət Partiyasının Mətbuat xidmətindən məlumat verilib.

Görüş zamanı Haqq Ədalət Partiyasının fəaliyyəti, Partiya tərəfindən yerlərdə təşkil olunan tədbirlər, ictimai rəyin formalaşmasında siyasi partiyaların artan rolu, “Böyük qayıdış” Dövlət proqramı çərçivəsində reallaşdırılan infrastruktur layihələr, təşviq olunan siyasi dialoq mühiti, habelə ölkənin ictimai həyatında müşahidə olunan canlanma və digər bu kimi vacib məsələlər müzakirə olunub.  

Qeyd olunub ki, dövlətin siyasi partiyalarla əlaqədar institusional və normativ təşəbbüsləri nəticəsində sağlam siyasi münasibətlər formalaşıb. Keçmişdə yalnız münaqişə, qalmaqal və müxtəlif təxribatlar ilə assosiasiya olunan siyasi partiyaların fəaliyyəti aparılan islahatlar sayəsində bu gün əməkdaşlıq, milli birlik müstəvisinə qədər irəliləyib. İndi partiyalar cəmiyyətin mütərəqqi fikirli vətəndaşlarını öz ətrafında toplayır və milli həmrəylik mühitinin qorunmasında aparıcı rol oynayır.

Tərəflər işğaldan azad olunmuş ərazilərə siyasi partiyaların birgə səfərlərin, davamlı olaraq keçirilən görüşlərin, mühüm məsələlər ilə bağlı verilən birgə bəyanatların, dəyirmi masa və açıq müzakirələrin gələcək nəsillərə xidmət edəcək dayanıqlı demokratik ənənələrin formalaşması prosesində əvəzolunmaz əhəmiyyətə malik olmasını xüsusi vurğulayıblar.

Fikir mübadiləsi çərçivəsində ölkədə yaşanan həmrəylik mühitini həzm edə bilməyən məkrli qüvvələrin manipulyasiyaları da geniş müzakirə olunub, informasiya manipulyasiyaları ilə mübarizədə siyasi partiyaların daha aktiv mövqe nümayiş etdirməli olduğu bildirilib. Milli dövlətçilik ənənələrə sadiqliyin və milli birliyin müstəsna əhəmiyyətini vurğulayan Partiya sədri bildirib ki, sədrlik etdiyi Haqq Ədalət Partiyası bundan sonra da qeyd olunan istiqamətlər üzrə əzmlə çalışacaq.

Prezident Administrasiyasının rəsmisi görüşün sonunda dövlət və cəmiyyətin inkişafına xidmət edən bütün təşəbbüslərdə aktiv mövqe ortaya qoyan Haqq Ədalət Partiyasına uğurlar arzulayıb.