Bu gün ölkəmizdə səhiyyə sahəsində  çox böyük inkişafa  nail olunub.  

Belə ki,  dünya standartlarına  cavab verən xəstəxanalar və klinikalar inşa edilib. Və tibb ocaqları ən müasir texnologiya, avadanlıqlarla təchiz  edilib. Bütün bunlar ən ağır xəstələri müalicə etməyə imkan verir.Üstəlim də ölkəmizdə heç də  Avropa həkimlərdən geri qalmayan  istedadlı və savadlı həkimlərimiz var. Amma bu savadlı həkimlərə bəzi xəstəxanaların  direktorları göz verib, işıq vermirlər.

Təbii ki, belə olanda o həkimlər ya iş yerlərini dəyişir, ya da bu da alınmayanda  ölkəni tərk edirlər. Son illər yüzlərlə həkim Avropa ölkələrinə üz tutub. Bu gün  respublikamızda həkim çatışmazlığı var. Təkcə Füzuli rayonunda yüzə yaxın həkim yeri boşdur. Tibb Universitetini bitirmiş məzunlar isə gərək

 Dövlət İmtahan Mərkəzində imtahan versin və bundan sonra işə qəbul edilsin. Bu isə uzun bir prosesdir. Təbii ki, az maaşla heç kim rayon yerində həkim işləmək istəmir. Savadlı və təcrübəli həkimlər isə rayondan Bakıya gəlib, özəl klinikalarda işə düzəlir və çörəkpulu qazanırlar.

Belə olan halda  rayon xəstəxanalarında boş yerləri, ancaq təyinatla doldurmaq olar. Ali məktəbi bitirən  məzunlara isə təyinat verilmir.Aydındır ki, belə durumda  rayonlarda həkim çatışmazlığı olacaq. Ona görə də əlaqədar qurumlar bu barədə  ciddi düşünməlidir!

Emil Faiqoğlu