Türkiyənin xarici işlər naziri Hakan Fidan Azərbaycana səfər edəcək.

Adalet.az xəbər verir ki, bu barədə “Anadolu Agentliyi” qəzeti məlumat yayıb.

Məlumata görə, HakanFidanın sentyabrın 15-16-da ölkəmizə səfəri zamanı onun azərbaycanlı həmkarı Ceyhun Bayramovla ikitərəfli və nümayəndə heyətləri səviyyəsində görüşlər keçirəcəyi, həmçinin Azərbaycan müdafiə naziri Zakir Həsənovla görüşəcəyi gözlənilir.

Hakan Fidanın Azərbaycan prezidenti İlham Əliyev tərəfindən də qəbul ediləcəyi gözlənilir.

Görüşlər zamanı Fidanın Türkiyə-Azərbaycan münasibətlərində strateji səviyyədə əldə edilən irəliləyişlərdən məmnunluğunu ifadə edəcəyi, iki ölkə prezidentləri tərəfindən müəyyən edilmiş 15 milyard dollarlıq ümumi ticarət həcmi hədəfinə çatmaq üçün səylərin gücləndirilməsinin vacibliyini vurğulayacağı və enerji və nəqliyyat sektorlarında ortaq gündəm və layihələri müzakirə edəcəyi gözlənilir.

Türkiyə XİN başçısının həmçinin iki müttəfiq ölkə arasında müdafiə sənayesi, təhlükəsizlik və hərbi sahələrdə davam edən əməkdaşlıqla bağlı məsələləri qiymətləndirəcəyi və iki ölkə arasında çoxtərəfli platformalarda, xüsusən də Türk Dövlətləri Təşkilatında (TDT) mövcud əməkdaşlığı nəzərdən keçirəcəyi gözlənilir.