Hər bir ölkənin ərazi bütövlüyü onun üçün  prioritet  vəzifədir. Başqa  sözlə demiş olsaq, əgər digər bir dövlət başqa bir ölkənin ərazisini  işğal edirsə bu onun  ərazi bütövlüyünün  tapdanması və eyni zamanda ölkənin imicinə vurulan  ən böyük zərbə hesab olunur. Təbii ki,  zamanından və məkanından asılı  olmayaraq bütün  dövlətlər öz müstəqilliyini  və ərazi bütövlüyünü  qorumağa  çalışır. Ən azından ona görə ki, həmin ölkə özünün gələcəyini, əhalisinin  təhlükəsizliyini  təmin etmək  üçün birmənalı olaraq  müharibə şəraitinə  hazır olmalıdır. 

Azərbaycan da nə çox, nə az düz 30 il 20 faiz torpaqlarının  işğal olunması  ilə razılaşmadı. Ona görə də bu istiqamətdə çox böyük  müdafiə tədbirləri  həyata keçirməyə başladı. Bir çox  Avropa ölkələri, o cümlədən Fransa çalışırdı ki, erməni işğalını dondursunlar və bu barədə nə beynəlxalq təşkilatlarda, nə də  digər mötəbər  yerlərdə söhbət açılmasın. Aydındır ki, ermənilərin havadarları  tək Fransa deyildi, eləcə də  digər böyük  dövlətlər  onların  haqsız işinə haqq qazandırır, 30 illik işğala göz yumur, üstəlik də bir fikri  bizə təlqin edirdilər ki, onlar  qalib dövlətdir, gedin ermənilərlə razılaşın.  Təbii ki, onlarla  heç  vaxt razılaşmaq mümkün deyildi. Çünki əgər  torpaqlarımız  20 faiz işğal edilmişdisə və işğalçılar da onu  sülh, danışıq yolu ilə  geri qaytarmırdılarsa aydındır ki, bunun cəmi bir çıxış yolu  vardı – müharibə! Amma bu  müharibəyə də  yenə avropalılar və  ermənilərin  digər  havadarları  heç cürə  razı olmurdular. Lakin buna  baxmayaraq, istər  Ulu  Öndər  Heydər Əliyevin, istərsə də prezident İlham Əliyevin  vaxtında Qarabağın  erməni  işğalı altında olması ilə bağlı  mötəbər  kürsülərdə fikirlər səsləndirilmiş və beynəlxalq təşkilatlara  əsl  həqiqət  çatdırılmışdı. Bununla  paralel  olaraq  Azərbaycan həm də iqtisadi, siyasi  və hərbi  sahədə  böyük işlər  həyata keçirirdi. Bu da  ondan  ibarət idi ki,  işğal altında olan torpaqlarımız  ermənilərdən azad edilsin  və həmin yerlərdə  bərpa, quruculuq işləri  gerçəkləşdirilsin, sakinlər geri dönsünlər.

Bütün bunlar o vaxtlar  çoxlarına  yuxu kimi  gəlirdi.  Yuxu kimi  gəlirdi ki,  Azərbaycan  işğal altında  olan  torpaqlarını  azad  edə bilməyəcək.  Bununla yanaşı, böyük dövlətlərin  bayaq dediyimiz kimi  canfəşanlığı  ermənilərin  nahaq  işlərinə  haqq  qazandırması  işğalçıları   ürəkləndirir və bir az da tamahlarını  artırırdı. Onlar yeni  ərazilər, yeni şəhərlər işğal  etmək barəsində fikirlər  səsləndirirdilər. Hətta deyirdilər ki, Gəncəni  alacağıq, Bakıya  tankla gedib orda  çay  içəcəyik. Düzdür, ermənilərin  tankı sonradan  Bakıya  gətirildi,  amma  Qənimətlər  parkına! 

Artıq  2020-ci il sentyabr ayının  27-dən  ermənilərin  hücumuna qarşı  əks hücum əməliyyatı  başladı. Heç ermənilər də  gözləmirdi ki, onlar bir neçə gün ərzində Füzuli və Cəbrayıl  istiqamətlərində  ağır zərbələr  alacaqlar.  Əlbəttə,  erməni  ordusunun  çaş-baş qalması, mürəkkəb  duruma  düşməsi və bir neçə gün  ərzində  Füzulinin  və Cəbrayılın  8 kəndinin  azad edilməsi onu  göstərirdi ki, Azərbaycan  ordusu  sürətlə hücuma   keçib və bu hücum  daha da  geniş vüsət alacaq.  Elə geniş vüsət aldı da. Müharibənin  qızğın  dövründə  ermənilərin havadarları  öz mətbuat  nümayəndələrini  bir-birinin ardınca Bakıya  göndərirdilər. Daha doğrusu, onları ermənilər maliyyələşdirir və hətta  jurnalistlərin  verəcəyi  sualları da  onlar müəyyən  edirdi.  Ona görə də   Cənab Prezident  İlham Əliyevlə  olan müsahibələrin bəzilərini  axıradək  efirdə vermir,  montaj edir  və özlərinə  sərf edən məqamları  cəmiyyətə çatdırırdılar. Cənab Prezident isə öz müdrik  və  uzaqgörən siyasəti, dolğun cavabları ilə  Qərb jurnalistlərini mat vəziyyətinə  salmışdı. Onların hamısı Bakıdan suyu  süzülə-süzülə  geri  qayıtdılar. Çünki heç vaxt  Cənab  Prezident  İlham Əliyev kimi  savadlı,  istedadlı və siyasi cəhətdən güclü   liderlə  rastlaşmamışdılar. Onların ağlı  Ermənistanın  baş naziri Nikol Paşinyana  gedirdi.  Çünki  Paşinyan  nə  ingilis  dilini  yaxşı bilir, nə də  siyasətdən  xəbəri  vardı.  Danışanda  sanki ağzını  əriştə  yandırırmış kimi  fikirlərini də ifadə edə bilmirdi.

Ümumiyyətlə, müzəffər Ali Baş Komandan Prezident İlham Əliyev  44 günlük İkinci  Qarabağ savaşında  dünyada  analoqu və oxşarı  olmayan  bir tarixi  qələbəyə imza atdı.  Amma Cənab Prezident bir dəfə də demədi ki, bu qələbəni mən qazanmışam. Və həmişə dedi ki, bu qələbəni Azərbaycan xalqı,  Azərbaycan  Ordusu, Azərbaycan Əsgəri  qazanıb. İlham Əliyev  dünyanın ən təvəzökar və ən  səbirli prezidentidir desək, yanılmarıq.  Çünki o hakimiyyətə  gəldiyi  ilk  gündən bu möhtəşəm  qələbənin təməlini  qoymuşdu. Hər şeyi  səbrlə, təmkinlə və uzaqgörənliklə  həll edirdi.  Eyni zamanda Azərbaycanın  iqtisadi  və hərbi  qüdrətinin  möhkəmlənməsi  üçün davamlı  olaraq  böyük işlər həyata  keçirilirdi. Ölkənin müdafiəsini  möhkəmlətmək üçün  büdcə vəsaitləri artırılırdı. Milyardlarla dollar  pul xərclənərək  Azərbaycan Ordusu  ən müasir  döyüş maşınları, texnikaları, tankları, qırıcıları, helikopterləri ilə  təmin  olundu. Cənab Prezident uzun illər  səbrlə  dözdü, axırda  ermənilərin  min oyununa dözmək  mümkün olmadı.  Yəni sentyabrın  27-dən  noyabrın 10-a qədər  İkinci Qarabağ savaşı  ildırım sürətilə davam etdi.

Bu xalq, bu millət  öz müzəffər Ali Baş Komandanı, Prezident İlham Əliyevin ətrafında bir  yumruq kimi  birləşdi. Bizim birliyimizi   heç bir  daxili  və xarici  qüvvələr sarsıda bilmədi.  Əksinə, bu  yumruq  hesabına  Cəbrayıl, Füzuli, Hadrut, Qubadlı, Laçın, Zəngilan, Kəlbəgər, Ağdam, Şuşa azad edildi. Bu yumruğun  davamı  təbii ki, gəlməli idi. Çünki  ermənilər 2020-ci ilin  noyabrın 10-da imza atdıqları  Bəyannamənin  şərtlərinə  əməl etmirdi. Həmin Bəyannaməyə görə  Qarabağdakı  erməni  hərbi birləşmələri  çıxmalı idi. Amma 3 il keçdi, yenə  çıxmadılar. Ona görə də Cənab Prezident  İlham Əliyevin əmri ilə Qarabağda antiterror əməliyyatı  aparıldı, 23 saat 43 dəqiqə ərzində  erməni  hərbi qüvvələri  darmadağın  edildi və onlar  ağ bayraq  qaldırdılar. Bu Dəmir Yumruğun nəticəsində  Xankəndi, Xocavənd, Ağdərə, Əsgəran, Xocalı və digər yaşayış məntəqələrimiz  erməni  hərbi birləşmələrindən  azad edildi və  2023-ci il noyabrın  8-də Prezident İlham Əliyev Xankəndində  möhtəşəm parad qəbul etdi. Bununla da  Azərbaycanın ərazi bütövlüyü tamamilə təmin oldu! 

Faiq QİSMƏTOĞLU

Yazı Medianın İnkişafı Agentliyinin maliyyə dəstəyi ilə hazırlanıb.