Rusiya və Ukrayna hazırda sülh razılaşması üçün əvvəlki dövrlərlə müqayisədə daha əlverişli vəziyyətdədir.

Adalet.az xəbər verir ki, bunu Türkiyə xarici işlər naziri Hakan Fidan deyib.

Onun sözlərinə görə, dörd il davam edən müharibə tərəflərə həm itkilərin miqyasını, həm də öz imkanlarının sərhədlərini açıq şəkildə göstərib. Bu səbəbdən artıq hər iki ölkə sülh danışıqlarına daha real yanaşır.

Türkiyə XİN başçısı bildirib ki, Moskva müəyyən şərtlər daxilində atəşkəs və hərtərəfli razılaşmaya hazır olduğunu nümayiş etdirib:

"Türkiyə isə bu prosesin bir sıra istiqamətlərində vasitəçilik edir və tərəflərlə müntəzəm təmasdadır. Əldə olunacaq razılaşma təkcə Ukraynada müharibənin dayandırılması üçün deyil, həm də Avropa qitəsinin uzunmüddətli təhlükəsizliyi baxımından xüsusi əhəmiyyət daşıyır. Bu sənəd Avropaya yönəlik yeni təhdidlərin qarşısını almaq üçün tarixi imkan yaradır”.