Əhəd Kərimov adlı çox savadlı, geniş dünyagörüşünə malik və özü də yaraşıqlı bir raykom katibi vardı. Allah rəhmət eləsin. Yeri gəlmişkən, Azərbaycan öz müstəqilliyini elan edəndə Ali Sovetdə həmin iclasa Əhəd müəllim sədrlik edirdi. Özünü raykom katibi kimi aparmazdı, müəllim kimi davranardı insanlarla. Heç vaxt onu hökm edən və bərkdən danışan, kiminsə üstünə səsini ucaldan görmədilər.
Ağdərədə ikinci katib işləyirdi. Şuşada birinci katibi işdən çıxartdılar, camaat arasında böyük narazılıq vardı. Əhəd Kərimovun xarakterinə yaxşı bələd olan Heydər Əliyev onu Şuşaya birinci katib göndərdi ki, getsin ab-havanı dəyişsin, narazılıqların qarşısını alsın. Qısa müddətdə Əhəd müəllim şuşalıların sevimlisinə çevrildi. Bir müddət Şuşada işləyəndən sonra Laçında vəziyyət pisləşdi, katibi işdən çıxartdılar. Əhəd müəllimi göndərdilər Laçına ki, vəziyyəti düzəltsin.
Birinci iş günündə yanına bir ağsaqqal gəlir. Başlayır çığıra-çığıra danışmağa. Sözünü bitirəndən sonra Əhəd müəllim sakitcə soruşur:
- Nə deyirdin?
Ağsaqqal yenə qışqıra-qışqıra danışır. Sözünü bitirəndən sonra Əhəd müəllim yenə sakitcə soruşur:
- Nə deyirdin? İndi sakit-sakit, çığırmadan de görüm nəyə gəlmisən?
Ağsaqqal səsinin səviyyəsini salır Əhəd müəllimin danışıq tərzinə, dərdini deyir.
- Beləcə de də sözünü, bayaqdan niyə çığırırdın?
- Katib həmişə bizimlə belə danışıb, biz də belə öyrənmişik.
- İndən belə belə danışacağıq, sakit, təmkinlə.
Əhəd müəllim yenə laçınlıların sevimlisinə çevrildi. Bir müddət Laçında çalışandan sonra Ucarda dava düşdü. Gərək ki, familiyası Ələkbərov idi, katib vardı. Camaatda böyük narazılıq yaratmışdı, qardaş-qardaşa salam vermirdi. Axırda o həddə çatdı ki, İcra Komitəsinin sədri işləyən göyçaylı bir xanımı gecə Büroda işdən çıxartdı və tapşırdı ki, heç kəs onu Göyçaya aparmasın. Xanım qalmışdı Raykomun küçəsində, qorxusundan heç kim ona yaxınlaşa bilmirdi.
Elə həmin günün səhərisi Heydər Əliyev katibi biabırçılıqla işdən götürdü və Əhəd müəllimi göndərdi Ucara. Əhəd müəllim Ucarda da xasiyyətinə uyğun gözəl bir ab-hava yaratdı.
Bir dəfə Qonaq evində söhbət edirdik. Dedi ki, indi gözləyirəm görüm hansı rayonda ara qarışacaq, məni göndərəcəklər ora.
Əhəd müəllim Kəlbəcərin Kolanısından idi, Kolanı qohumluğumuz vardı. Ağdama gedib-gələndə mütləq Ucara dönərdim bir stəkan çay içərdik, söhbətləşərdik, babalarımızdan danışardıq. Bəzən buraxmazdı, gecə qalardım. Tanınmış hüquqşünas Adil Minbaşı onda Ucarda məhkəmənin sədri idi, məni onunla ilk dəfə Əhəd müəllim tanış etmişdi. Həmişə çörək yeyəndə onu da çağırardı.
Bir dəfə yenə Ucara dönmüşdüm, Əhəd müəllim dedi:
- Təcili Bakıya çıxmalıyam, sən Adillə istirahət elə, yeyin-için, deyəsən, məni Qazaxa göndərirlər, axşama qayıdaram.
Gecə gəldi, dedi ki, məni Qazaxa yox, Bərdəyə göndərirlər.
Həmin vaxt Bərdənin katibi Rüstəm Səfərəliyev idi. İşdən çıxmışdı, Bərdədə vəziyyət gərginləşmişdi. Əhəd müəllimin yenə dediyi oldu, yenə narahat rayona göndərdilər ki, ab-havanı dəyişsin.
Bu xatirələri niyə yazdım? İndi Tərlan Əhmədov Əhəd Kərimovun vəziyyətinə düşüb. Harda bir komanda axsayırsa göndərirlər o klubda vəziyyəti yoluna qoysun. «Neftçi»ni 7-ci yerdən götürüb gətirir 2-ci yerə, Avrokuboklara vəsiqə qazanır, çıxarırlar. Ondan əvvəl «Xəzər»i sahmana salır, əla bir komanda yaradır, ordan da çıxarırlar. Nə bilim pis vəziyyətdə olan «Azal»ı formalaşdırır, yenə çıxarırlar. Gedir «Keşlə»yə, bitmiş komandanı yenidən yuxarı pillələrə qaldırır, yenə çıxarırlar, qalır işsiz.
İndi də göndərirlər «Kəpəz»ə – stadionu olmayan «Kəpəz»ə. Axırıncı yerlərdə fırlanan «Kəpəz»ə. İndi «Kəpəz»i də yuxarı pillələrə qaldıracaq, yenidən quracaq, yəqin ondan sonra da yenə çıxaracaqlar, qalacaq işsiz. Sonra da göndərərlər yəqin ki, «Sumqayıt»a.
Yəni Tərlan Əhmədov rəhmətlik Əhəd Kərimovun taleyini yaşayır.