“Səhiyyə Nazirliyi Respublika Gigiyena və Epidemiologiya Mərkəzi suyun təhlükəsizliyinin və sanitar-epidemioloji sabitliyin təmin olunması istiqamətində genişmiqyaslı dövlət nəzarəti həyata keçirir”.

Adalet.az xəbər verir ki, bunu “Sağlam radio”nun (93 FM) “Sağlam səhər” verilişində Səhiyyə Nazirliyi Respublika Gigiyena və Epidemiologiya Mərkəzinin Sanitariya-gigiyena, fiziki-kimyəvi, toksikoloji və radioloji müayinələr laboratoriyasının həkim-laborantı Lalə Şirinova deyib.

Onun sözlərinə görə, Mərkəzin fəaliyyəti həm içməli su təchizatına, həm də çimərliklərdə dəniz suyunun monitorinqinə nəzarəti əhatə edir:

“İçməli suyun laborator monitorinqi ölkə üzrə mərkəzləşdirilmiş su təchizatı sistemlərindən, su anbarlarından və modul tipli təmizləyici qurğulardan götürülən nümunələr əsasında aparılır. Respublika Gigiyena və Epidemiologiya Mərkəzinin laboratoriyaları Azərbaycan Akkreditasiya Mərkəzi tərəfindən akkreditasiyadan keçirilib. Suyun bakterioloji, sanitar-kimyəvi və toksikoloji göstəricilərinin müayinəsi AZS ISO/IEC 17025 standartının tələblərinə uyğun şəkildə, müasir avadanlıqlarla həyata keçirilir”.
Lalə Şirinova bildirib ki, Mərkəzdə aparılan laborator analizlər və toksikoloji-gigiyenik müayinələr AZS ISO/IEC 17025 standartına uyğun icra olunduğundan, əldə edilən nəticələr həm ölkə daxilində, həm də beynəlxalq səviyyədə etibarlı və rəsmi hesab olunur:
“Məqsədimiz suyun keyfiyyət göstəricilərinin mövcud standartlara tam uyğunluğunu təmin etməkdir. Hər hansı problem aşkar edildikdə isə bunun aradan qaldırılması üçün aidiyyəti qurumlara məlumat verilir və müvafiq tədbirlər görülür”.