Son zamanlar demək olar ki, Ermənistan silahlı qüvvələri sərhəd boyunca Kəlbəcər və Laçın rayonlarındakı postlarımızı intensiv atəşə tuturlar. Eləcə də Qarabağdakı separatçı qüvvələrin terrorçuları bizim mövqelərimizə atəş açırlar. Sülhməramlıların gözü qarşısında. Və hələ də Qarabağda erməni silahlı qüvvələrinin əsgərləri və texnikası fəaliyyət göstərir, 10 noyabr Bəyannaməsində qeyd olunsa da hələ də Ermənistan öz silahlı qüvvələrini Qarabağdan çıxarmır.
Nikol Paşinyan Avropada bir bəyanat verir, qayıdıb İrəvanda ayrı bəyanat verir. Müdafiə nazirini ABŞ-dakı havadarlarının yanına göndərir, xarici işlər nazirini də Rusiyadakı havadarlarının.
Səbrimizlə oynayır, 44 günlük müharibə deyəsən Ermənistana dərs olmayıb. İstəyir ki, biz təmkinimizi pozaq və onların Ermənistandakı postlarını göyə sovuraq və dünyaya car çəksinlər ki, Azərbaycan Ermənistana təcavüz edir. Bir tərəfədən də KTMT-ni müharibəyə cəlb etsin. ABŞ və Avropa da tumanını başına keçirsin ki, qoymayın Azərbaycan Ermənistanı dağıdır.
İki məsələni unudur. Birincisi, KTMT deyilən təşkilat heç bir gücə malik deyil, həm də bu təşkilatın üzvlərinin əksəriyyəti müsəlman və türk dövlətidir. İkinci bir tərəfdən Rusiyanın başı Ukraynaya qarışıb, yeddi aydır ki, hələ bir nəticə əldə edə bilməyib.
Qaldı ABŞ və Avropaya, onların da başı Rusiya-Ukrayna müharibəsinə qarışıb və bu müharibə onları da boğaza yığıb.
ABŞ-a da çox arxayın olmasın. 2008-ci ildə Rusiya Gürcüstanı işğal edəndə rus tankları Tiflisin 30 kilometrliyinə dayananda ABŞ neyləyə bildi? Bir bəyanat verdi, vəssalam. Uzaqbaşı, belə bir bəyanat da bizə verəcək ki, siz Allah, yazıq ermənilərlə işiniz yoxdur.
Qonşuya ümid olan torpaqsız və dövlətsiz qalar. Necə ki Ermənistan müstəqil bir dövlət deyil, bilmirəm, Rusiyanın neçənci əyalətidi. Bir dövlət ki öz sərhədlərini özü qoruya bilmir, ona dövlət demək olmaz. Digər tərəfdən Paşinyanın ikiüzlü siyasəti Rusiyanı da çərlədib, Putini də boğaza yığıb.
Bu dünyanın işini bilmək olmaz, Gizir. Əgər Ermənistan sülhə gəlməsə, yenə bambılılığını davam eləsə Dəmir Yumruq heykəlinin biri Qərbi Zəngəzurda da qoyula bilər.
Tanrı Azərbaycanımızı qorusun!
Tanrı Cənab Prezidentimizi qorusun!
Tanrı əsgər və zabitlərimizi qorusun!