Deməli,saytlarda və sosial şəbəkələrdə paylaşılıb ki, bir şuşalı gedib öz həyətlərinə və köhnə dırtmıxlarını tapıb və ağlaya-ağlaya həyətlərini təmizləyir. Və yazırlar, eləcə də şərhlərdə münasibət bildirirlər ki, quramadı. Guya indiyədək erməni o dırtmıxı tapmayıb və niyə o həyətdə nəsə etməyib.
Heç bir quraması yoxdu. Bircə misal gətirəcəm.
Ağdama ilk səfərimdə dostum Nizami Əliyevin oğlu Məmməd Əliyevlə getdik bizim həyətə.
Onların evi də «Dostluq» kino-teatrı ilə üzbəüz məşhur Zeynal Məmmədovun rəhbərlik etdiyi Ağdam rayon Həmkarlar Təşkilatının arxası idi. İndi ikimiz gedirik. Birdən evlərinin yanından ötəndə dedi:
- Əmi, girəcəm həyətimizə.
Bizə ANAMA, həm də hərbçilər demişdilər ki, hər ehtimala qarşı həyətlərinizə girməyin.
Nə qədər dedim ki, qardaş oğlu, girmə həyətinizə, mina ola bilər. Dedi, partlasa da girəcəm və girdi. Bir də gördüm əlində bir tərəfi çürümüş bir sapılca ilə çıxdı:
- Əmi, anam bu sapılcada mənə o qədər qayqanağ bişirib ki, aparıb təmir etdirəcəm və qoy bu sapılcada xanımım mənə qayqanağ bişirsin.
Elə sevinirdi ki, olmayan evləri də yadından çıxmışdı, Qarabağ dərdiylə dünyasını dəyişmiş Nizami müəllim də, əmiləri Şahin də, Allahverdi də, Zahid də.
Və onu da qeyd edim ki, Ağdamın Ağdam olmasında vaxtilə rayon Partiya Komitəsinin birinci katibi işləmiş babası Məmməd Əliyevin böyük xidmətləri olub.
Bəzən təkrar lazımdı. İndi gedirik və çatırıq bizim həyətə.
Deyir:
- Əmi, sizin ev bizim evdən uzaq idi axı?!
- Qardaş oğlu, o vaxt uşaq idin, addımların balaca idi, ona görə bizim ev uzaq görünürdü. İndi maşallah, bir addımın o uşaq vaxtındakından dörd dəfə çoxdu.
Gülür:
- Heç mən bunu fikirləşməmişəm.
İndi Məmməd bəlkə sapılcaya ondan otuz dəfə artıq pul xərcləyib təmir etdirib və xanımı həmin sapılcada ona və övladlarına qayqanağ bişirir.
Lağ edən dostlar, bunu sizin üçün yazdım.