ALLAHIN ALTINDA O AĞBAŞDAN 10 NƏFƏR DƏ OLAYDI
Deməli, Ağdamın «Qarabağ» komandasında Mişa adında (əsl adını bilmirəm, Mişa deyirdilər) bir futbolçu vardı. Bu Mişa Moskvanın hansısa, «Dinamo»nunmu, «Spartak»ınmı oyunçusu idi. Nə qələt eləmişdisə 2-3 il iş vermişdilər və Şahbulaqdakı 8-ci kalonda yatırdı. Amma ona icazə vermişdilər ki, formasını saxlamaq üçün «Qarabağ» komandasında oynasın.
Oyun başlamamışdan bir saat əvvəl həbsxana maşınında gətirirdilər stadiona. Bir az məşq edirdi, sonra çıxırdı oyuna. Cavan, ağbaş bir oğlan idi. Qeyri-adi, gözəl futbol oynayırdı. Və təbii ki, çox adam, xüsusilə kənddən gələn azarkeşlər onun kimliyi haqqında məlumatsız idilər.
Oyun gedir. Bu «Ağbaş» Mişa da təxminən Streltsov kimi oynayır.
Yanımda oturan bir ağsaqqal elə yazıq-yazıq dedi ki:
- Kaş bu Ağbaşdan on nəfər də olaydı.
O, «dənə» dedi, mən «nəfər» yazıram. Dünən Serbiya ilə oyuna baxanda həmin ağsaqqalın sözü yadıma düşdü. Fikirləşdim ki, kaş Şahruddindən 10 nəfər də olaydı.