"Ədalət"in vaxtı: Ramiz Novruzla
Çoxlarımız bizə
biçilən zamanın, bəlkə də, böyük hissəsini özümüzü tapmağa həsr edirik. Amma elə
insanlar da var ki, ömür yolunun ta başlanğıcında, zamanın astanasında kim
olacağını anlayır, qarşısına məqsəd
qoyur. "Ədalət”in vaxtı”nın bu dəfəki qəhrəmanı ömrünü sənətə, səhnəyə həsr
etmiş şəxslərdəndir. Zamanın seçilən və sevilənlər sırasına saldığı qəhrəmanı yaxından
tanıyaq:
Xalq artisti Ramiz Novruz – 1955-ci ildə Biləsuvar rayonunun Səmədabad
qəsəbəsində doğulub. 1978-ci ildə Azərbaycan Dövlət İncəsənət İnstitutunun dram
və kino aktyorluğu fakültəsini bitirib. 1981-ci
ildə Azərbaycan Akademik Milli Dram Teatrının truppasına daxil olub. İlyas Əfəndiyevin
"Şeyx Xiyabani", "Mahnı dağlarda qaldı", "Hökmdar və
qızı", Hüseyn Cavidin "İblis", Mirzə Fətəli Axundzadənin "Lənkəran
xanının vəziri", Mir Cəlalın "Dirilən adam" və s. tamaşalarında
rol alıb.
R.
Novruzun yaradıcılığının bir qolunu da kino fəaliyyəti təşkil edir. İstedadlı
aktyor "Nizami" filmində Dərbənd elçisi, "Sizi dünyalar qədər
sevirdim" filmində general Həzi Aslanov və s. rollara çəkilib.
Teatr sənətindəki
xidmətlərinə görə Ramiz Novruz 1993-cü ildə Azərbaycan Respublikasının Əməkdar
Artisti və 1998-ci ildə Xalq Artisti fəxri adlarına layiq görülüb.
...Və Ramiz
Novruzla zaman yolçuluğu:
"Zaman köhlən atdır, qovduqca daha sürətli qaçır”
– Zaman
nədir və sizin üçün nə əhəmiyyət kəsb edir?
– Zaman
konkret deyil, çox geniş anlamdır. Zaman sanki bir köhlən atdır, qovduqca
daha sürətli qaçır. Arxasınca düşüb nə qədər yetişmək istəsən də bacarmırsan.
Zaman insan, cəmiyyət həyatında ən vacib amildir, çünki məhz onun içərisində həyat,
cəmiyyət mövcuddur və yaşamını davam etdirir. Bir səhnə adamı kimi deyə bilərəm
ki, zamanın aktyor taleyində özünəməxsus yeri var. Çünki aktyor fəaliyyəti zamandan çox
asılıdır: vaxtı ötürmək, zamanından özünü sübut etməmək həmin aktyor üçün ürəkaçan
olmur. Belə bir söz var: "Aktyor qəlbi oynanmamış rolların qəbiristanlığıdır”. Gənc vaxtı deyək ki, Romeonu oynaya bilməyən,
özünü bu rol üçün təsdiqləyə bilməyən bir aktyor 50 yaşında əlbəttə ki, bu rolu
ala bilməz və bu obraz onun üçün əlçatmaz bir keçmişdə, zamanın məzarlığında
qalar.
– Həm də
görünüş baxımından ola bilər, aktyor üçün bu çox vacibdir...
– Əlbəttə,
zamanın insan üzündə, vücudunda qoyduğu izlər bir aktyorun fəaliyyətində
mütləq öz sözünü deyəcək, həm də onun xeyrinə yox.
– Bizi əhatə
edən zamandan başqa, hər bir insanın öz daxili zamanı da var: öz qaydaları, öz
saatı, qrafiki ilə işləyən zaman. Ramiz Novruz öz daxili zamanında hardadır, bu
zamanı necə tənzimləyir?
– Bəli,
həm qaydaları, həm saatı, həm də öz ritmi var. Mənim daxili zamanım həmişə elə
yaşadığım zamana, məqama uyğun olaraq tənzimlənib. Düzü, mənə həmişə nostalji
hisslərlə yaşamaq gülünc gəlib.
"Daxilən gənc olan insan həmişə gələcəyi düşünür”
– Amma
yaradıcı insanlarda nostalji hissləri həmişə daha güclü olur...
–
Yaradıcı və yaşlanmış, hətta köhnəlmiş insanlarda bu belə olur. Keçmişin xiffətini
çəkirlər, çünki artıq o vaxtki kimi fəaliyyət göstərə bilmirlər. Amma daxilən gənc
olan insan cismani olaraq neçə yaşında olursa olsun həmişə sabahı, gələcəyi
düşünür. Bəzən cavan insanlar belə heç görmədiyi illərin xiffətini çəkirlər,
onları anlamaq olmur?! 90 yaşında insanlar var ki, bu günün gəncləri ilə
bir düşünür. Ona görə insanların öz daxili zamanını,
onun ritmini duymaması mənə qəribə gəlir. Düşünürəm ki, insan nə bacarırsa bu
gün eləməlidir. Yaponların gözəl bir atalar sözü var: "Keçmiş zaman artıq
keçib, gələcək isə olmaya bilər. Ona görə də indiki zamanla yaşamaq lazımdır”. Böyük yazıçı Çingiz Aytmatovun da zamanla bağlı yaxşı
sözü var: "Problemlərin həllini gələcəkdə düzələcək deyə, gələcək nəsillərin üzərinə
buraxa bilmərik. Çünki gələcəyimiz bizim bu gün nə edəcəyimizdən çox asılıdır”.
Düşünürəm ki, zaman qarşısında hər bir insan məsuliyyət daşımalıdır.
– Yeri gəlmişkən,
yaşadığı zamanla razılaşmayanlar və ya özlərinə başqa dövran arzulayanlar da
olur. Başqa zamanın, başqa məkanın insanı olduğunu iddia edirlər. Belə
insanlarla yəqin rastlaşmısınız.
– Bu
insanlarda daha çox fantaziya bolluğundandır. Keçmişi arzulamaq daha çox
acizlik əlamətidir. Amma gələcəyi arzulayırsa, bu yəqin ki, kosmik təxəyyüldür,
hardasa irəlini görmək, ən azından onun xəyalını qurmaq bacarığıdır. Məsələn, mənim
atam müharibə veteranı idi. Berlinə qədər gedib çıxmışdı. Amma heç vaxt şücaətlərindən
danışmazdı. Halbuki heç düz-əməlli döyüşməmiş insanlar müharibədən elə
danışardılar ki, oranı görmüş atam belə çaşıb qalardı. Yəni bəzi insanların təxəyyülü
həqiqətən də elə güclü olur ki, görmədiyi, olmadığı yerləri, zamanları belə istədiyi
kimi bəzəyir. Misalı həm də ona görə gətirdim ki, atam sizin dediyiniz kimi öz
sadəliyi, saflığı, təmizliyi və digər dürüst cəhətlərinə görə, nə məkanına, nə
də zamanına aid insan deyildi. Ona baxanda hiss olunurdu ki, sanki başqa
zamanda, başqa ölkədə doğulmalıydı.
"Qazanc məsələsində zamanı üstələyirəm”
–
Zamanın sizdən aldıqları çox olub, ya verdikləri?
– Yəqin
ki maddi-cismani olaraq aldıqları çox olar. Amma mən maddiyata "bəs” deməyi
bacaran insanam. Həmişə də yorğanımın uzunluğunu bilib, ayağımı uzatmışam.
Övladlarıma da bunu tövsiyə etmişəm. Amma mənim də zamandan aldıqlarım az
deyil. Yaxşı dostlar qazanmışam, gözəl ailəm var. Əgər bu gün tanınan, sevilən
aktyoramsa, hələ də müqəddəs saydığım səhnədə, sevdiyim işdə çalışıramsa, deməli
qazanc məsələsində zamanı üstələyirəm. Həm də bunları zəhmətlə, dişimlə-dırnağımla
qazanmışam, ona görə də mənə çox əzizdir.
–
Zamandan daha nələr gözləyirsiniz, nə istərdiniz?
– Ən əsas
hər şeyin gerçək olmasını istərdim. Sənətimiz, teatrımız daha arzulanan olsun, insanlar
başdansovdu yox,
ürəklə gəlsinlər, maraq
artsın. Teatral atmosferin daha da inkişaf etməsini arzulayıram. Teatr üçün
daha çox əsərlər yazmaq, tamaşalar hazırlamaq istəyirəm. Aktyor işinə daha
böyük diqqət ayrılsın. Ümumilikdə ölkəmizdə, millətimizdə mədəni intibahın
baş verməsini istərdim.
– Vaxtınızı necə bölürsünüz? Fəaliyyətiniz çoxşaxəlidir, hər şeyə vaxt ayıra bilirsiniz?
– Məndə
belə bir xasiyyət var: teatrla məşğul olanda, televiziya və ya kinoyla əlaqəni
kəsirəm. Yəni televerilişlərdən uzaq oluram, filmə çəkilmirəm. Ya da əksinə. İşlədiyim
teatrda da qrafik qaydalar tələb olunmadığına, aktyorlar üçün sərbəst şərait yaradıldığına görə özümə, yazılarıma ayırmağa kifayət qədər vaxtım
qalır. Belə məqamlarda – özüm özümlə tək qalıb daxilimdə hesabat iclası keçirməyi
çox sevirəm. Gördüklərimi, yaşadıqlarımı analiz edirəm. Bəzi yazılarımı belə
analizlərdən sonra ərsəyə gətirmişəm.
–
Maraqlıdır, belə məqamların bəhrəsi nə olur, nədən yazırsınız?
– İlk
hekayəmdə, aktyor olmaq istəyən bir gənc oğlanın sadəlövhlüyündən, müqəddəs
saydığı səhnəyə gəlib ordakı həqiqətləri görərək, aktyorları tanıyaraq ümidlərinin
qırılmasından söhbət gedir. Çox sevdiyi bir aktyordan elə kobud hərəkət görür
ki, bu onda ruh düşkünlüyü yaradır. Burda deməyə çalışmışam ki, ömür boyu yaxşı
rollarda oynamış, insanların təfəkküründə alicənab bir şəxs kimi qalmış aktyor həyatda da belə olmaq məcburiyyətindədir, bu onun
tamaşaçı qarşısında borcudur. Tamaşaçı sevdiyi aktyora yaxınlaşıb ondan
avtoqraf istəyəndə onunla qətiyyən kobud davranmaq olmaz, çünki o,
bəlkə də həmin aktyoru ömründə bircə dəfə görəcək və hafizəsinə də gördükləri
hopacaq.
–
Razıyam, həmişə qəhrəman adam kimi rollarda tanıdığım bir aktyorun həyatda
qorxaq olduğunu görsəm, şəxsən bir tamaşaçı kimi onu bir daha izləmərəm, üstəlik
rola, əsərə, müəllifinə də inamım itər...
–
Tamaşaçının məhəbbətini, təsəvvürünü, kobud desək, zorlamaq olmaz. Ən azı, bir
akyor yaxşı insan olmağı bacarmalıdır. Bundan başqa, zamanın ağrıdıcı məqamlarından,
xüsusilə 20 Yanvar hadisələrində, Qarabağ müharibəsində xalqımızın başına gətirilənlər
həmişə müraciət etdiyim mövzulardır. "At ilinin birinci ayı” adlı bir pyes yazmışdım.
Gəncə teatrı səhnələşdirdi. "Hələ "sevirəm” deməmişdilər” pyesi isə Qarabağ müharibəsinə aid, o zamanın acınacaqlı
durumu, ordumuzun aciz vəziyyəti məni qələmə sarılmağa məcbur etmişdi. Yazıçılıq
iddiasında olmamışam, sadəcə məni ağrıdan, qəlbimə toxunan məsələləri teatr
dili ilə çatdırmağa çalışmışam. Eyni zamanda tarixi-coğrafi məkan adları,
xüsusilə bu günə qədər yanlış bildiyimiz adlar, sözlər mənim diqqətimi çəkir,
onları araşdırıram.
– Tarix
də elə zamandır. İnsan tarixi yazır, araşdırır, idarə edir, bəs zamanı necə?
– Zamanı
yox, müəyyən dönəmdə insan təfəkkürünü, yaşam tərzini idarə edə bilən insanlar
olub. Zamanı bu cür yönəldən insanlar keçmişdə də olub, indi də var ki, xalqa,
cəmiyyətə istiqamət verən insanlardır. Yaxud da zamanı cəmiyyətə
uyğunlaşdırıblar.
– Zəmanəsinin
qəhrəmanı da yəqin ki, bu insanlardır...
– Cəfər
Cabbarlının "Aydın” Pyesində belə bir fikir var ki, "Zamanın uçurumlarını tarix
boyu bir neçə insanlar adlayıb keçə bilmişlər ki, onlarla da tarix daima fəxr
edir”. Əlbəttə, uçurumları, çətinlikləri aşıb, xalqını arxasıyca aparan
insanlar məhz zəmanəsinin qəhrəmanlarıdırlar. Böyük İskəndər, Şah İsmayıl Xətai,
Teymurləng, Napaleon və başqaları zamanın qəhrəmanları olmaqla yanaşı həm də
zamana diktə edən insanlardır.
– İnsan
onu necə dərk edir ki, məhz onun zamanıdır, vaxt onun üçün işləyir?
– Bax
burda o bayaq dediyimiz daxili zaman işə düşür, insan öz daxili zamanın
ritmini, başqa sözlə desək intuisiyasını işə salır və bunu hiss edir. Zaman özü
də sanki belə insanları görüb, ortaya çıxardır. Vəziyyəti yetişdirir, elə bir
eksterimal vəziyyət yaranır ki, dünənə qədər adi insan həmin vəziyyəti dərhal
qiymətləndirib ortaya atıla bilir. Belə insanlar zamanı bəzəyə biliblər.
"İnsan yaşadığı zamanı tanımalıdır”
–
Zamanla ayaqlaşmaq necə, asandımı?
– Zaman düzgün dəyərləndirilsə, müdrik düşünülsə,
məncə ayaqlaşmaq, çətin olmaz. İnsan yaşadığı zamanı tanımalı, onu
dərk etməli, öz rolunu orda görməlidir. Bizim çoxumuz bacarmadığımız işlərlə məşğuluq.
Hər kəs öz bacardığı işlə məşğul olsa, əlbəttə ki, vaxt bizə işləyər, xeyrimizə
olar. Vaxtı ləngitmək olmaz. Millət olaraq, ümumilikdə zamanlamanı düz
seçmirik. Bəlkə bizim saflığımızdan, sadəlövhlüyümüzdən irəli gəlir. Nəriman Həsənzadənin "Pompeyin yürüşü” əsərində
deyildiyi kimi: "Tarix bizim olub, tarixi yazan isə özgələr”. Yəni bir növ
uzaqgörənliyimiz azdır. Gələcəyi çox düşünmürük. Elə bu günümüzdə də çox şeyi başdansovdu
edirik.
İstedadımız, sərvətimiz çox olduğu üçün həndəvərimizdə dolananlar da bundan
istifadə edib. Məmməd Arazın şeirində deyildiyi kimi, "Bir zərrənin işığına
milyonlar şərik”. Azərbaycan həmin o zəngin zərrədir, işığımıza şərik olmaq istəyənlər
çoxdur. Bu mənada insanların arzularını, tarixini oğurlamaq elə onun zamanını
oğurlamaq deməkdir.
–Vaxtla
bağlı insanlara nə tövsiyə edərdiniz?
–
Vaxtdan qiymətli heç nə yoxdur. Ustad Şəhriyarın məşhur şeirində belə bir bənd var:
Heydərbaba,
alçaqların köşk olsun
Keçmişlərin
gələcəyə məşq olsun,
Bizdən
sonra gələnlərə eşq olsun,
Övladımız
məsləkini, məzhəbini danmasın,
Hər içi
boş sözlərə aldanmasın.
Məncə bu
bənd yeni nəslə ünvanlanan tövsiyələri özündə cəmləyir. İçi boş sözlərə aldanıb
zamanı qurban verməyin.
Biz də "Ədalətin” vaxtı”nın qonağına Vaxtın onunla həmişə ədalətli davranmasını arzu edirik.
Şəfiqə Şəfa