Faiq QİSMƏTOĞLU: ... İNAM YOXDUR

FAİQ QİSMƏTOĞLU
1281 | 2021-09-22 10:17

...Belə baxanda hər şey normal görünür. Çünki ən ucqar rayonlarda belə müasir tipli xəstəxanalar, diaqnostika mərkəzləri və ən yeni avadanlıqlar var. Əlbəttə, bunlar hamısı çox gözəldir. Ancaq elə ki, o xəstəxanalara baş çəkirsən, o xəstəxanalara gedirsən və orda başqa bir mənzərənin şahidi olursan. Məsələn, Şirvan şəhərində həkimin səhlənkarlığı üzündən cərrahiyyə əməliyyatı zamanı istifadə olunmuş bint həmin xəstənin daxilində qalıb.

Uzun müddət xəstə əziyyət çəkib, axırda da ona deyiblər ki, sən xərçəng xəstəsisən. Həmin xəstəni gətiriblər Bakıya. Tibb Universitetinin Klinik Mərkəzində əməliyyat ediblər və ondan 2 metrə yaxın çürümüş bint çıxıb. İndi həmin xəstə də Şirvanda onu əməliyyat etmiş həkimi verib məhkəməyə. Ona dəymiş maddi və mənəvi ziyanı tələb edir. Lap əcəb edir.

Dedim axı, bizdə hər cür şəraiti olan xəstəxanalar var. Amma yaxşı həkimlərin və savadlı tibb işçilərini barmaqla saymaq olar. Və yazıq həkimlərə heç elə əmək haqqı da vermirlər. Ona görə də savadlı həkimlər ayda 200-300 manata gedib rayonda işləmək istəmir. Təbii ki, savadlı həkimləri də özəl klinikalar axtarıb tapır və yüksək maaşla işə qəbul edir. İndi yazıq camaat, rayon yerində görüm hansı yaxşı həkimi tapa biləcəksən.

Təbibin isə işləri lap dolaşığa düşüb. Ən azından ona görə ki, bu qurum çox savadlı, eləcə də təcrübəli mütəxəssisləri işə cəlb eləmədi. 50 ilin, 60 ilin infeksionist həkimləri qaldı qıraqda, təcrübəsi olmayan və kimlərəsə yaxınlığı ilə tanınan tibb işçilərini bu işə qoşdular. Nəticəsi də bax, belə xoşagəlməz oldu. Təbibin nəzarətində olan klinikalarda və xəstəxanalarda rüşvətxorluq gündən-günə çiçəkləndi. Və təsadüfi deyil ki, Yeni Klinikanın və eləcə də, Zığdakı modul tipli xəstəxananın baş həkimləri rüşvət alarkən hüquq-mühafizə orqanları tərəfindən saxlanıldılar. Onsuz da camaat arasında söz-söhbət gəzirdi ki, koronavirus xəstələrini müalicə edən xəstəxanalarda pasientlərdən 300-500-1000 manat arasında rüşvət alınır. Amma buna bir o qədər də inanmaq olmurdu. Ancaq elə ki, bir neçə xəstəxanada baş həkimlər rüşvət alarkən saxlanıldılar. Bax, ondan sonra camaatın danışıqları öz təsdiqini tapdı.

Tanınmış həkim, tibb elmləri namizədi, dosent Rəşid Mahmudov deyir ki, təbibin fəaliyyətindən mən də narazıyam. Çünki onlar uzun illərin təcrübəsi olan həkimlərdən istifadə etmədilər. Bu sahədə heç bir səriştəsi olmayan tibb işçilərini işə cəlb elədilər. Bu isə bax, belə bir xoşagəlməz vəziyyət yaradıb.

Artıq təbibin rəhbərliyi dəyişib. İndi ora başqa bir insan sədr təyin edilib. Bizdə bir də görürsən ki, vəzifə kreslosunu digəri ilə əvəz etdilər. Amma yenə heç nə dəyişmədi. Ancaq insan ümidini itirməli deyil. İnanaq ki, təbibin yeni rəhbərliyi bu sistemdə dəyişiklik yaradacaq, nöqsanları aradan qaldıracaq və əvvəlki neqativ halları təkrar etməyəcək.

Amma məsələnin bir tərəfi var ki, bizim səhiyyə sistemimiz çöküb. Və çökmüş səhiyyə sistemini qısa zamanda bərpa etmək və inkişaf mərhələsinə keçirmək elə də asan deyil. Gərək əvvəldən Səhiyyə Nazirliyini bu kökə qoymayaydılar. Nazirliyi iki yerə ayırmaqla səhiyyəyə çox böyük zərbələr dəydi. İndi bilmək olmur, Azərbaycandakı səhiyyə sahəsində bu mürəkkəb durumu kim aradan qaldıracaq: Səhiyyə Nazirliyi, yoxsa təbib?!

Hər halda inanaq ki, biz tezliklə ölkəmizdə səhiyyənin yüksəlişini hiss edəcəyik. İnşallah!

TƏQVİM / ARXİV