SON DƏQİQƏ:

Faiq QİSMƏTOĞLU: HARALISAN?!

  51578   |  
Şriftin ölçüsü  

... Dünyada çox xəstəliklər var. Və bu xəstəlikərin də əksəriyyəti sağalandı. Ürəyin ağrıyır əməliyyat eləyirlər, özünə gəlirsən, şəkərin qalxıb onu da normaya salırlar, mədən, bağırsağın, öd kisən səni incidirsə, o da çarəsiz deyil. Allah-Təala hər dərdi verdiyi kimi, onun əlacını da insanlara bəxş eləyib. Min şükür!

Amma elə "xəstəlik” də var onu heç bir dava-dərman, heç bir həkim, heç bir loğman sağalda bilmir. Hətta deyirlər ki, qozbeli qəbir düzəldər. Bu "xəstəliyi” heç qəbir də düzəldə bilmir. Və bu "xəstəlik” elə bir zaddır ki, dünyanın bütün həkimləri yığışsa da, ona əlac tapa bilməzlər! Ki, bu "xəstəlik” sağalan deyil. O "xəstəliyin” adı belədir: Yerliçilik!

Dünyanın hər yerində bu "xəstəlik” var. Amma bizdə olduğu kimi tay kütləvi deyil. Yəni bizdə bu çox böyük bir bəladır. Hətta xərçəngdən, şəkərdən və digər xəstəlikdən daha qorxuludur. Və bizdə bu "xəstəliyə” ən çox tutulanlar da vəzifə adamlarıdır. O vəzifə adamları ki, birinin sənədləri gəlib ora çıxanda orasına baxırlar, burasına baxırlar, görürlər ki, qrafası düz deyil, onların yerlisi deyilsən, sənin sənədini tullaylırlar gedər-gəlməz yerə. O sənədi sonra nəinki onlar, heç sənin özün də tapa bilməzsən!..

Məmləkətimizdə acı bağırsaq kimi hər yanı ağzına alan bu "xəstəliyin” neçə yaşı var onu deyə bilmərik. Amma bir onu deyə bilərik ki, Azərbaycan ərazisində mövcud olmuş xanlıqlar dövründə də ən ağır durumda olan Bakı xanlığı, Şəki xanlığı, Qarabağ xanlığı, Gəncə xanlığı, Naxçıvan xanlığı dar gündə bir-birinə kömək əli uzatmayıblar. Gəncə xanlığı rusların hücumuna məruz qalanda o biri xanlıqlar öz kefində olub. Ki onlar mənim yerlilərim deyillər. Qoy getsin rusla da özləri haqq-hesab çürütsünlər. Və beləcə axırda hamısı məlum ölkələr tərəfindən işğal edilir, dağıdılır, məhv edilir.

Deməli, bu "xəstəlik” bizə ta uzaq keçmişdən qanla, sümüklə gəlib çatıb. Heç yaxşı şey olsaydı gəlib çatmazdı. Pis olduğuna görə, gəlib bizi bu "xəstəlik” yaxalayıb.

İki nəfər bir-birilə yenicə tanış olan kimi o dəqiqə biri o birindən soruşur:

- Qardaş, sən haralısan?

O biri qardaş da desə ki, sənin yerlinəm, o dəqiqə vəziyyət dəyişir. Yəni onun yerlisi çıxsa kefi durulur, yerlisi olmasa xala-xətrin qalamasın üzündə təbəssüm yaranır və tay söhbətin arxasını davam elətdirmir...

Adamı yandıran odur ki, "haralısan” sualını adi savadsız insanlar deyil, alim, professor, yüksək vəzifəli şəxslər də adama ünvanlayır. Bax, onda millət olaraq nə qədər parçalandığımızı, zəif olduğumuzu və özümüzü sevmədiyimizi bir daha yəqin edirsən. Onsuz da Azərbaycanın bu başından o başına cəmi-cümlətanı 5-6 saatlıq yoldur. Balaca bir ölkəni, kiçik bir vətəni yerlərə, məkanlara bölmək bu məmləkəti bir qədər də balacalaşdırır, cılızlaşdırır.

Sizi bilmirəm, bu sual mənə ünvanlananda elə bil başıma bir qazan qaynar su tökülür və qalıram dodağımı gəmirə-gəmirə. Çox adam belə sual verəndə deyirəm ki, haralı olmağın nə mənası var? Əsas odur ki, bu ölkənin vətəndaşıyam, sənin qan qardaşınam, dilimiz və dinimiz birdir! Dilimiz və dinimiz birsə, deməli, biz bu vətənin, bu ölkənin övladlarıyıq!

"Haralısan” sualı ilə bağlı tələbəlik illərində başıma gələn bir əhvalatı danışmaq istəyirəm. Biz tələbə olanda Dövlət Televiziya və Radio Verilişləri Komitəsində təcrübə keçirdik və tez-tez də süjetlər hazırlayırdıq. Belə süjetlərin birini də Politexnik İnstitutundan düzüb qoşmuşdum. Dekandan müsahibə almışdım və hər şey də çox yaxşı alınmışdı. Dekanın müavini elmlər namizədi olan bir oğlan idi. Mənimlə səmimi söhbət eləyirdi. Birdən ondan soruşdum ki, müəllim, sən haralısan? Elə bil o cavan alimi tok vurdu. Bayaqkı səmimiyyət itdi, əsəbləşdi və mənə bir təpki göstərdi. Dedi ki, istedadlı gəncsən, bu sualı vermək səni hörmətdən salır. Bayaqdan danışığına, məntiqinə heyran qalmışdım. Amma bu sualın səni mənim gözümdən saldı. O mənimlə çox səmimi söhbət elədi. Düz bir saat mənə "dərs” dedi. O "dərs” heç vaxt yadımdan çıxmayacaq. Və o söhbətdən sonra bir də "haralısan” sözünü dilimə gətirmədim. Onda mənim 19 yaşım vardı.

Görünür, bizim hər birimizə nə vaxtsa belə bir "dərs” keçilməlidir ki, vətəni bölgələrə bölməyək. Yəni bir-birimizlə tanış olanda "haralısan” deyə sual ünvanlayıb qanımızı itin qanına döndərməyək. Yaxşı insanın, savadlı ziyalının, istedadlı adamın yeri olmur. Onlar üçün bütün dünya, bütün Yer üzü Vətən sayılır. Çünki onlar o vətənin daşını da, torpağını da, gülünü də sevirlər və o vətənin hər qarış torpağı üçün şəhid olmağa belə hazırdılar.

Bir yaxın dostum var. Çox istedadlı bir ziyalıdır. Azərbaycan Dövlət Universitetinin jurnalistika fakültəsini bitirib. Sonra həmin universitetin hüquq fakültəsini qutarıb. Əlavə Politologiya İnstitutunda da təhsil alaraq üçüncü diplomu da əldə edib. Vaxtilə həm mətbuatda, həm də hüquq ixtisası üzrə dövlət qurumunda qüsursuz fəaliyyət göstərib. İndi bu böyük ziyalı balaca bir iş üçün hara müraciət edir bir söz demirlər, günü günə satırlar. Nə var, nə var o, kimlərinsə yerlisi deyil. Gərək bu gün vəzifəyə getmək üçün kiminsə yerlisi olmalısan, kiminsə yaxını bilinməlisən.

Erməni bizim düşmənimizdir. Ancaq düşmən olsa da, bir-birilə görüşəndə soruşurlar: "Hayes, Türkes”. Yəni ermənisən, yoxsa türk? Yəni ermənisənsə, sənin üçün hər yanda yaşıl işıqdı. Bizdə də soruşurlar: "Haralısan?”. Əgər desən şəkiliyəm, qarabağlıyam, bakılıyam, lənkıranlıyam, sənə sevgiylə yanaşacaqlarmı?! Hər halda, bu vətənin hər bir yeri, hər bir məkanı, hər bir ocağı bizim üçün doğmadır – istər şəkili ol, istər bakılı, istərsə də lənkəranlı!

Gəlin yerliçilik "xəstəliyi”ndən canımızı qurtaraq. Bu "xəstəlik”dən canımızı qurtara bilsək, işğal olunmuş torpaqlarımızı da azad edəcəyik, çətinkilərimizi də dəf etməyi bacaracağıq, bir-birimizlə can deyib, can eşidəcəyik, dövlətimizin bütövlüyünü qoruyacağıq! Və "haralısan” deyənlərə də kimliyindən asılı olmayaraq təpki göstərəcəyik. Bu sualın da bir cavabı var:

- Biz Azərbaycanlıyıq!!!


Dosta Göndər :

  

SON XƏBƏRLƏR

2021-10-21

Video

Yazarlar

MARAQLI

DÜNYA

ƏDALƏT BU GÜN
October: 21 19 16 14 12 09 07 05 02
September: 25

Redaktor seçimi

FOTOREPORTAJ

GÜNÜN SİTATI

SORĞU

COVİD 19 peyvəndi vurdurmusunuz?

ÇOX OXUNAN

GÜNÜN LƏTİFƏSİ

Vasif Quliyevin kefi yuxarıdı, sanki səmalarda uçur. Aqil Abbas:

- Vasif, xeyir ola, genə göylərdə uçursan?

Vasif müləllim:

- Qağa neyniyim, "Parıament" siqareti cəkirəm, amma parlamentə düşə bilmirəm. "Prezident" yağı yeyirəm, prezident ola bilmirəm. Bircə

 "Vozdux" arağı real kömək edir, içən kimi havalarda uçuram.

ARXİV

TƏQVİM

FACEBOOK