çünki Rusiya heç vaxt Ermənistana silah-sursat, raket-maket, tank-top, isgəndər-misgəndər satmayıb. Çünki Ermənistanın pulu yoxdur ki, o qədər silah-sursat alsın. Ya bağışlayıb, ya da guya kreditə verib. Bağışlayıb deyəndə, əslində bağışlamayıb, əvəzində Ermənistanın sənaye müəssisələrini, nə bilim elektrik stansiyalarını, zavod və fabriklərini, bir sözlə daşlı-torpaqlı bütün Ermənistanı verdiklərinin əvəzinə girov götürüb.
Əslində Ermənistan Rusiyanın for-postu deyil, forsuz-morsuz postudu.
İndi araşdırma gedir, Şuşaya «İsgəndər M» raketini kim atıb, hardan atıb və Ermənistan həmin qadağan olunmuş raketi kimdən alıb? Rusiya Federal Təhlükəsizlik Xidməti də vurhavur guya araşdırır.
Mətbuatda gedən yazılar və müzakirələri oxuyub gülürəm. Müzakirələrə gülmürəm ey, əslində bütün bunlar Əziz Nesinin «Apona sərgisi» hekayəsini yadıma salır, gülürəm.
Deməli, Aponada sərgi açılacaq, Türkiyəyə də yer ayırıblar. Bütün hökumət Türkiyənin bu sərgidə nəyini nümayiş etdirəcəkləri üstündə baş sındırırlar. Qırğın-qiyamət, baş nə təhər itibsə… Tapın hekayəni oxuyun, onda siz də güləcəksiniz. Başını itirən hökumət bu arada belə ticarət sazişləri hazırlayır: «İsveçrəyə saat ixrac etmək, Misirə pambıq satmaq, Həbəşistandan da atom bombası almaq».
İndi Ermənistan «İsgəndər M» raketlərini yəqin ki, Həbəşistandan alıb. Heç Rusiya özü də «İsgəndər» raketləri istehsal eləmir, o da Həbəşistandan alır. Yəqin Həbəşistandan çerez İran gətirəndə yolda üç-dördünü salıb itirib. Ermənilər də bicin biridi də, oğurlayıblar.
Biz də düşmüşük yazıq Rusiyanın üstünə. Türkiyə başını o vaxt Apona sərgisi zamanı itirdiyi kimi, Rusiya da başını itirib. Ukrayna bir tərəfdən, Krım bir tərəfdən, nə bilim Donbas bir tərəfdən, «Şimal axını» bir tərəfdən, NATO bir tərəfdən, pandemiya da ki qoymur heç gözünü aça. Navalnı da lap zəhlələrini töküb. ABŞ da üzünə dirənib.
Ona görə də inanmıram ki, Federal Təhlükəsizlik Xidməti bu məsələni çözə bilsin.
Çözə bilsə Sülhməramlıların komandanı Rustəm Muradov çözə bilərdi, intəhası, o yazığın da başı qarışıb Dədəvəngdə kəbin kəsdirməyə gedən erməni gənclərinə yengəlik eləməyə.